CUET நுழைவுத் தேர்வுக்கு விண்ணப்பிப்பதற்கான கால அவகாசம் நேற்றுடன் நிறைவடைந்த நிலையில், வருகிற 5-ஆம் தேதி வரை நீட்டித்து தேசிய தேர்வு முகமை அறிவித்துள்ளது.
புதிய கல்விக் கொள்கையின்படி, மத்திய பல்கலைக்கழகங்களில் இளங்கலை மற்றும் முதுநிலை பட்டப்படிப்புகளின் சேர்க்கைக்கு ‘CUET’ என்னும் பல்கலைக்கழகளுக்கான பொதுத்தேர்வு நடத்தப்படுகிறது. கடந்த 2022- 23-ஆம் கல்வி ஆண்டு முதல் இந்த தேர்வு கட்டாயம் ஆக்கப்பட்டுள்ளது.
12-ஆம் வகுப்புப் பாடத்திட்டத்தின் அடிப்படையில், ஒவ்வொரு ஆண்டும் இந்தத் தேர்வு நடத்தப்படுகிறது. தேசியத் தேர்வுகள் முகமை இந்தத் தேர்வை நடத்துகிறது.
அந்த வகையில், இந்த ஆண்டுக்கான இளங்கலை பட்டப்படிப்புக்கான CUET தேர்வு விண்ணப்பப்பதிவு, கடந்த மாதம் 10-ஆம் தேதி தொடங்கியது. இது நேற்றுடன் நிறைவு பெறுவதாக இருந்த நிலையில், நீட்டிக்கப்பட்டுள்ளது.
CUET தேர்வுக்கான விண்ணப்பப்பதிவை வருகிற 5-ஆம் தேதி வரை நீட்டித்து, தேசிய தேர்வு முகமை அறிவித்துள்ளது. இந்த நுழைவுத்தேர்வு மே மாதம் 15-ஆம் தேதி முதல் 31-ஆம் தேதி வரை நடைபெறவுள்ளது.
