அமெரிக்க அதிபர் ட்ரம்ப் மற்றும் சீன அதிபர் ஜி ஜின்பிங் இடையே வாஷிங்டனில் நடைபெறும் உயர்மட்ட சந்திப்பு, சர்வதேச புவிசார் அரசியலிலும் பொருளாதாரத்திலும் பெரும் தாக்கத்தை ஏற்படுத்தக்கூடியதாக அமைந்துள்ளது. இந்த சந்திப்பால் இந்தியாவிற்கு என்ன மாதிரியான விளைவுகள் ஏற்படும் என்பது பற்றிய ஒரு செய்தி தொகுப்பு.
பல ஆண்டுகளாகவே இந்தியா, தேச நலனுக்கே முன்னுரிமை என்று எந்தக் கூட்டணியிலும் இல்லாமல் எல்லா கூட்டணியிலும் செயல்படும் தனது வெளியுறவுக் கொள்கையைச் சாமர்த்தியமாக நடைமுறைபடுத்தி வருகிறது.
அமெரிக்கா, ரஷ்யா, ஐரோப்பா, ஜப்பான், இஸ்ரேல், வளைகுடா நாடுகள் மற்றும் பிற உலக நாடுகளுடன் உறவுகளைப் பேணி வரும் நிலையிலும், சீனாவுடனும் நல்லுறவையும் போட்டியையும் சாமர்த்தியமாக மேம்படுத்தி வருகிறது. இந்தியாவின் இந்த வெளியுறவுக் கொள்கை உலகின் பெரும் வல்லரசுகளின் நடத்தையே மாற்றியுள்ளது.
இதன் விளைவாகவே அமெரிக்காவும், சீனாவும் தொழில்நுட்பத்தில் போட்டியிடவும், வர்த்தகம் குறித்துப் பேச்சுவார்த்தை நடத்தவும், ஈரான் பற்றி விவாதிக்கவும், அதே நேரத்தில் இராணுவத் தடுப்பாற்றலைப் பேணவும் முயற்சி செய்து வருகின்றன.
ஏற்கெனவே கடந்த மே மாதத்தில் ஏற்பட்ட வர்த்தக ஒப்பந்த புரிதலின் அடிப்படையில் தேர்ந்தெடுக்கப்பட்ட துறைகளில் வர்த்தகத்தை நிர்வகிப்பதற்கான வழிமுறைகள் குறித்தும் இருநாடுகளும் தீவிரமாக விவாதங்கள் நடத்தி வருகின்றன.
அமெரிக்க அதிபர் ட்ரம்ப், சீன அதிபர் ஜி ஜின்பிங் இடையே நடக்கும் பேச்சுவார்த்தைகளில் வர்த்தகமே முன்னிலை வகிக்கிறது. அமெரிக்கப் பொருட்களுக்குச் சீன சந்தையைத் திறந்து விடுவதற்கான உறுதிமொழிகளை சீனாவிடம் அமெரிக்கா எதிர்பார்க்கிறது. சீனாவோ தனது ஏற்றுமதியாளர்களுக்கான சுங்க வரி விதிப்பில் கணிசமான தளர்வுகளை எதிர்பார்க்கிறது.
கடுமையான வர்த்தகப் போர் மற்றும் கூடுதல் வரி விதிப்புகளை ட்ரம்ப் குறைத்தால் அது சர்வதேச சந்தையை சீரமைக்கும் என்பதால் உலகளாவிய விநியோகச் சங்கிலி இயல்பு நிலைக்குத் திரும்பும் என்று எதிர்பார்க்கப்படுகிறது. இதனால் இந்தியாவின் ஏற்றுமதி மற்றும் இறக்குமதி வணிகம் தடையின்றி நடைபெறும் என்று கூறப்படுகிறது.
இதற்கிடையில் தனது சொந்த முக்கிய கனிமத் திறன்களை வளர்த்து வரும் இந்தியா, உலகளாவிய விநியோகச் சங்கிலிகளின் பன்முகப்படுத்தலின் ஒரு பகுதியாகவே இருந்து வருகிறது. இதில் சீன கனிம வர்த்தகத்தில் அதிக நம்பகத்தன்மை ஏற்பட்டாலும் அமெரிக்கா மாற்று விநியோகஸ்தர்கள் மீதான தனது வர்த்தக உறவை உடனடியாக நிறுத்தாது என்றே கூறப்படுகிறது.
விரிவடைந்து வரும் அமெரிக்கத் தொழில்நுட்பக் கூட்டாண்மைகளாலும், சீனாவிற்கு வெளியே நம்பகமான விநியோகச் சங்கிலிகளை உருவாக்குவதற்கான அமெரிக்காவின் முயற்சிகளாலும் இந்தியா பயனடைந்துள்ளது.
இந்நிலையில் AI செமிகண்டக்டர்கள் போன்ற தொழில்நுட்பத் துறையில் சீனாவைத் தனது முதன்மை தொழில்நுட்பப் போட்டியாளராகவே கருதும் அமெரிக்கா அத்துறைகளில் தனது பிடியை தளர்த்துமா ? என்ற கேள்வி எழுந்துள்ளது.
இந்த விவகாரத்தில் அமெரிக்கா சீனா இடையே உடன்பாடு ஏற்பட்டால் வேறு எங்கும் எளிதில் பெற முடியாத தொழில்நுட்ப மற்றும் தொழில்துறைத் திறன்கள்இந்தியாவில் மட்டுமே கிடைக்கும் என்பதை இந்தியா மேம்படுத்த வேண்டியிருக்கும் என்று கூறப் படுகிறது.
ஈரானுடனான சீனாவின் நிதித் தொடர்புகள் குறித்தும் விவாதிக்கப்படும் நிலையில்
ஈரானில் சாபஹார் துறைமுகம் உள்ளிட்ட பல முதலீடுகளைச் செய்துள்ள இந்தியாவிற்கு நேரடியாக தாக்கத்தை ஏற்படுத்தும் என்று கூறப்படுகிறது.
தைவான் விஷயத்தில் அடிப்படையில் மாறுபட்ட நிலைப்பாடுகளைக் கொண்டுள்ள சீனா மற்றும் அமெரிக்காவுக்கும் இடையே எந்தவொரு உடன்படிக்கைக்கும் தைவான் பிரச்சனையே ஒரு முக்கிய தடையாக உள்ளது.
2020க்குப் பிறகு சீனாவிற்கு மாற்றாக ஒரு முக்கிய உற்பத்தி மையமாக தன்னை நிலைநிறுத்தி கொண்டுள்ள இந்தியாவுக்கு, அமெரிக்காவும் சீனாவும் தங்களுக்குள் ஒரு தற்காலிக வர்த்தக ஒப்பந்தத்தை ஏற்படுத்துவதன் மூலம் உலகளாவிய நிறுவனங்கள் இந்தியாவை நோக்கி வருவதற்கான வேகம் கொஞ்சம் கொஞ்சமாக குறையலாம் என்றும், அதனால் இந்தியாவுக்குப் பெரும் இழப்பு ஏற்படலாம் என்றும் எதிர்பார்க்கப்படுகிறது.
எதிர்பார்த்தபடி சீனாவுடனான பேச்சுவார்த்தைகள் ஒரு முடிவை எட்டாத சூழலில் சீனாவைக் கையாள்வது கடினம் என்பதை உணர்ந்து அதிபர் ட்ரம்ப், இந்தியா அதிக மதிப்புமிக்கதாக மாறியுள்ளது என்று முடிவு செய்யலாம்.
இந்தப் பேச்சுவார்த்தைகள் அமெரிக்க-சீனப் போட்டியை முற்றிலும் முடிவுக்குக் கொண்டுவராது என்பதால், இந்தியாவின் புவிசார் அரசியல் முக்கியத்துவத்துக்கு எந்தப் பாதிப்பும் ஏற்படாது.
ட்ரம்ப்பும், ஷி ஜின்பிங்கும் ஒரு உடன்பாட்டிற்கு வருவார்களா என்பதல்ல கேள்வி.
இதையடுத்து அமெரிக்காவுக்கு இந்தியாவிடமிருந்து என்ன தேவைப்படும் என்பதே முக்கியமான கேள்வி.
எனவே, பொருளாதார ரீதியாக தனது உற்பத்தித் திறனையும், உள்நாட்டுச் சந்தையையும் சொந்த பலத்தில் மட்டுமே உயர்த்திக் கொள்ள வேண்டும் என்பதையே இந்தச் சந்திப்பு உணர்த்துகிறது
