தமிழகத்தில் அரிசி விலையைக் கட்டுப்படுத்த ஆந்திராவில் இருந்து நெல் மூட்டைகளைக் கொண்டுவர அனுமதி வழங்கப்படும் என அமைச்சர்கள் செங்கோட்டையன், வெங்கட்ரமணன் ஆகியோர் தெரிவித்துள்ளனர்.
திருவள்ளூர் மாவட்டம், திருத்தணி அருகே உள்ள பொன்பாடி சோதனைச் சாவடியில் அமைச்சர்கள் செங்கோட்டையன், வெங்கட்ரமணன் ஆகியோர் திடீர் ஆய்வு மேற்கொண்டனர். அப்போது, ஆந்திராவில் இருந்து தமிழகத்திற்கு வரும் வாகனங்கள் மற்றும் சரக்கு வாகனங்களின் ஆவணங்களை ஆய்வு செய்தனர்.
தமிழகத்தில் ரேஷன் அரிசி கடத்தப்படுவதை முழுமையாகத் தடுக்கவும், ஆந்திராவில் இருந்து நெல் மூட்டைகளைக் கொண்டுவந்து விற்பனை செய்ய அனுமதிக்கவும் அதிகாரிகளுக்கு அறிவுறுத்தினர்.
இதன் மூலம் அரிசி விலையைக் கட்டுப்படுத்த நடவடிக்கை எடுக்கப்படும் என அமைச்சர்கள் தெரிவித்தனர். இதற்கிடையே, குடிநீர் வசதி இல்லாமல் தவித்த ஏ.எம். பேட்டை கிராம மக்களின் கோரிக்கையை ஏற்று, உடனடியாகக் குடிநீர் வசதி ஏற்படுத்தித் தருமாறு அதிகாரிகளுக்கு அமைச்சர் செங்கோட்டையன் உத்தரவிட்டார்.
