வெளிநாட்டு ஏற்றுமதியை குறைத்து, உள்நாட்டில் அரிசி விலையை கட்டுப்படுத்தும் வகையில், அரிசி ஏற்றுமதிக்கு மத்திய அரசு 20 சதவிகிதம் வரி விதித்திருக்கிறது.
இந்திய மக்களின் முக்கிய உணவாக இருப்பது அரிசிதான். ஆனால், இந்தியாவில் பதிவாகிவரும் நிலையற்ற மழை காரணமாக, கடந்த சில வருடங்களாக விவசாய உற்பத்தி கடுமையாக பாதிக்கப்பட்டிருக்கிறது. மேலும், எல் நினோ வேறு அச்சுறுத்தி வருகிறது. இதனால், உள்நாட்டுச் சந்தையில் அரிசி விலை உயர வாய்ப்பு இருக்கிறது. இதன் தாக்கம், சில்லறை பண வீக்கத்தில் அதிகளவு எதிரொலிக்கும். இதை முன்கூட்டியே கணித்த மத்திய அரசு, ஏற்றுமதிக்கான தடை மற்றும் வரி விதிப்பு ஆகிய ஆயுதங்களை கையில் எடுத்திருக்கிறது.
அந்த வகையில், பாசுமதி தவிர்த்த வெள்ளை அரிசி ஏற்றுமதிக்கு சமீபத்தில் தடை விதித்தது. தற்போது, புழுங்கல் அரிசி ஏற்றுமதிக்கு 20 சதவிகிதம் வரி விதித்திருக்கிறது. சர்வதேச அளவில் புழுங்கல் அரிசி ஏற்றுமதி செய்யும் நாடுகளில் இந்தியா மிகவும் முக்கியமானது. 2022-ம் ஆண்டில் மொத்த அரிசி ஏற்றுமதியில் புழுங்கல் அரிசியின் ஏற்றுமதி மட்டும் 7.4 மில்லியன் டன்கள் என்பது குறிப்பிடத்தக்கது. தவிர, இந்தியாவில் அரிசி விலை ஏற்கெனவே 11 வருடங்களாக இல்லாத அளவுக்கு உச்சத்தில் இருக்கிறது.
ஆகவே, அரிசி ஏற்றுமதிக்கான தடை மற்றும் வரி விதிப்பு போன்றவை உள்நாட்டில் விலை உயர்வை தடுக்கும் என்று எதிர்பார்க்கப்படுகிறது. இதன் காரணமாக, செப்டம்பர் மாதம் முதல் உணவு பணவீக்கம் குறைய வாய்ப்பு இருக்கிறது. சர்வதேச அளவில் அரிசி ஏற்றுமதியில் இந்தியா முக்கிய நாடாக இருக்கும் நிலையில், அரிசிக்கான தடையும், வரி விதிப்பும் உலகளவில் பெரிய பாதிப்பை ஏற்படுத்தும் என்று எதிர்பார்க்கப்படுகிறது. காரணம், ஏற்கெனவே, சீனாவில் மழை, வெள்ளம் காரணமாக, அந்நாட்டின் அரிசி உற்பத்தி அதிகளவில் பாதிக்கப்பட்டிருக்கிறது. இதனால் ஓட்டுமொத்த தென்கிழக்கு நாடுகளிலும் அரிசி விலை உயர்ந்து வருவது குறிப்பிடத்தக்கது.
