அமெரிக்காவில் நான்கு கிழக்குக் கடற்கரை மாநிலங்களில் ஒரு வருட காலமாக இந்திய மற்றும் பிற ஆசிய நாடுகளைச் சேர்ந்தவர்களின் நகைக் கடைகளைக் குறிவைத்து பயங்கர ஆயுதங்களைக் கொண்ட கும்பல் கொள்ளையடித்து வந்தது.
இந்தக் கடைகளில் பெரும்பாலும் கடையை நடத்துபவரின் குடும்பத்தினரே ஊழியர்களாகப் பணியாற்றி வந்தனர் என்பது குறிப்பிடத்தக்கது.
கொள்ளையர்களால் குறிவைக்கப்பட்ட 9 தெற்காசிய நகைக் கடைகளில், 4 கடைகள் இந்திய வம்சாவளியைச் சேர்ந்தவர்களுக்குச் சொந்தமானது.
ஜனவரி 7, 2022-இல் இருந்து ஜனவரி 27, 2023 வரையிலான மாதங்களில் நியூ ஜெர்சி, பென்சில்வேனியா, வர்ஜீனியா மற்றும் புளோரிடாவில் ஆசிய அமெரிக்கர்களுக்குச் சொந்தமான நகைக் கடைகளில் இந்தக் கும்பல் கொள்ளையில் ஈடுபட்டது. பெரும்பாலும் சிறு வணிகர்களைக் குறிவைத்து, பல்லாயிரக்கணக்கான டாலர் மதிப்புள்ள நகைகளைக் கொள்ளையடித்தனர்.
கருப்பு ஆடையுடன் கையுறைகள் மற்றும் முகமூடிகள் அணிந்து மாறுவேடமிட்ட இந்தக் கும்பல், துப்பாக்கிகள் ஏந்தியபடிக் கொள்ளையடித்து இக்கும்பல் கொள்ளைக்கு பிறகு தப்பிச்செல்ல எப்போதும் திருடப்பட்ட வாகனங்களையே பயன்படுத்தியது.
பல மாநிலங்களில் குற்றங்கள் நடந்ததால், மாநில அதிகாரிகளும் ஒருங்கிணைந்த நடவடிக்கைகள் மூலம் தேடுதல் வேட்டையைத் தொடங்கினர். நீண்ட விசாரணைக்குப் பின், தடயங்களை வைத்து, இக்குற்றங்களில் ஈடுபட்டதாக 16 நபர்களைக் கைது செய்தனர். இக்குற்றங்களில் தொடர்புடைய ஒருவர் வீட்டில் இருந்து துப்பாக்கிகளும், ரூ.2.5 கோடி மதிப்பிலான ரொக்கப் பணமும் கைப்பற்றப்பட்டுள்ளது .
கைது செய்யப்பட்டவர்கள் மீது 19 குற்றச்சாட்டுகளுடன், ஹாப்ஸ் சட்டம் எனப்படும் “மாநிலங்களுக்கிடையேயான வர்த்தகத்தில் தலையிட சதி செய்தல்” என்னும் பிரிவிலும் வழக்குகள் பதிவுச் செய்யப்பட்டது.
குற்றம் சாட்டப்பட்டவர்களுக்கு கண்டிப்பாக 20 வருடங்களுக்கும் மேலான சிறை தண்டனை கிடைக்கும் என வழக்கறிஞர்கள் கூறுகின்றனர். இந்தக் கொள்ளைக் கும்பலை விரைவில் பிடித்து கைது செய்தற்காக காவல் துறையினரை மக்கள் பாராட்டி வருகின்றன.
