மணிப்பூர் மற்றும் அந்தமான் & நிக்கோபார் கடல் பகுதியில் லேசான நிலநடுக்கம் ஏற்பட்டுள்ளது.
மணிப்பூர் மாநிலம் உக்ருல் மாவட்டத்தில் திங்கட்கிழமை இரவு நிலநடுக்கம் ஏற்பட்டதாகத் தேசிய நில அதிர்வு மையம் தெரிவித்துள்ளது.
வட இந்திய மாநிலங்களில் அண்மைக்காலமாக நிலநடுக்கங்கள் ஏற்பட்டு வருகிறது. இந்நிலையில், மணிப்பூர் மாநிலத்தில் திங்கட்கிழமை இரவு 11.1 மணிக்கு நிலநடுக்கம் ஏற்பட்டது. இது ரிக்டர் அளவில் 5.1 ஆக பதிவாயுள்ளது. இந்த நிலநடுக்கமானது, 20 கிலோ மீட்டர் ஆழத்தை மையமாகக் கொண்டு ஏற்பட்டதாக புவியியல் ஆய்வு மையம் தெரிவித்துள்ளது.
நிலநடுக்கத்தால் மணிப்பூரின் உக்ருல் மாவட்டத்தில் இரவில் அயர்ந்து தூங்கிக்கொண்டு இருந்த மக்கள் அதிர்ச்சி அடைந்து வீதிகளில் தஞ்சமடைந்தனர்.
நிலநடுக்கத்தால் ஏற்பட்ட பாதிப்புகள் குறித்து இதுவரை எந்த தகவலும் வெளியாகவில்லை. முன்னதாக, கடந்த ஜூலை 21-ந் தேதி அன்று உக்ருல் மாவட்டத்தில் 3.5 ரிக்டர் அளவிலான நிலநடுக்கம் ஏற்பட்டது.
இதேபோல், அந்தமான் கடலில் நிலநடுக்கம் ஏற்பட்டுள்ளது. இன்று அதிகாலை 03:39 மணியளவில் ஏற்பட்ட இந்த நிலநடுக்கமானது அந்தமான் கடலில் 4.4 ரிக்டர் அளவில் 93 கிலோ மீட்டர் ஆழத்தில் ஏற்பட்டதாகத் தேசிய நிலநடுக்கவியல் மையம் தெரிவித்துள்ளது.
லேசான நிலநடுக்கம் என்பதால், எந்தவித பாதிப்பும் ஏற்படவில்லை என்று கூறப்படுகிறது. நிலநடுக்கத்தால் எந்த வித சுனாமி எச்சரிக்கையும் விடுக்கப்படவில்லை என்பது குறிப்பிடத்தக்கது.
