அக்டோபர் 1-ந் தேதி நாடு முழுவதும் நடைபெறும் மெகா தூய்மைப் பணியில் பொதுமக்கள் பங்கேற்குமாறு மத்திய அரசு அழைப்பு விடுத்துள்ளது.
நாடு முழுவதும் அக்டோபர் 1-ந் தேதி பொது இடங்களில் தூய்மைப்பணிக்கு மத்திய அரசு ஏற்பாடு செய்துள்ளது. பொதுமக்கள் பங்கேற்க அழைப்பு விடுத்துள்ளது.
மகாத்மா காந்தி பிறந்த நாளை ஒட்டி, ‘சுகாதார சேவை’ என்ற பெயரில், நாடு முழுவதும் செப்டம்பர் 15-ந் தேதி முதல் பிரமாண்ட தூய்மைப்பணி நடந்து வருகிறது. இது அக்டோபர் 2-ந் தேதி வரை நடைபெற உள்ளது.
அதன் ஒரு பகுதியாக அக்டோபர் 1-ந் தேதி காலை 10 மணிக்கு நாடு முழுவதும் பொது இடங்களில் மெகா தூய்மைப்பணி மேற்கொள்ளப்படுகிறது. இந்த மெகா தூய்மைப்பணியில் பொதுமக்கள் ஒவ்வொருவரும் ஒரு மணி நேரம் பங்கேற்குமாறு ‘மனதின் குரல்’ நிகழ்ச்சி மூலம் பிரதமர் நரேந்திர மோடி அழைப்பு விடுத்தார்.
இதுதொடர்பாக மத்திய வீட்டு வசதி மற்றும் நகர்ப்புற விவகார அமைச்சகம் வெளியிட்ட அறிக்கையில் கூறியிருப்பதாவது, காந்தி ஜெயந்தியை முன்னிட்டு, பிரதமர் நரேந்திர மோடி நாட்டு மக்களுக்குத் தனித்துவமான அழைப்பு விடுத்துள்ளார். அதன்படி, நாடு முழுவதும் அக்டோபர் 1-ந் தேதி காலை 10 மணிக்கு மெகா தூய்மைப் பணி நடைபெறும்.
நாடு முழுவதும் உள்ள சந்தை பகுதிகள், இரயில் நிலையங்கள், மத வழிபாட்டுத் தலங்கள், சுற்றுலாத் தலங்கள், நீர்நிலைகள் உள்ளிட்ட பொது இடங்களில் தூய்மைப்பணி நடைபெறும். இதில், நாட்டின் அனைத்து தரப்பு மக்களும் பங்கேற்குமாறு அழைப்பு விடுக்கப்பட்டுள்ளது.
மேலும், ஒவ்வொரு பேரூராட்சி, ஊராட்சிகள், சிவில் விமான போக்குவரத்து, இரயில்வே, தகவல் தொழில்நுட்பம் போன்ற மத்திய அரசுத் துறைகள், பொது நிறுவனங்கள் ஆகியவை தூய்மைப்பணிக்கு ஏற்பாடு செய்ய வேண்டும்.
தொண்டு நிறுவனங்கள், தனியார் அமைப்புகள், குடியிருப்போர் நல சங்கங்கள் ஆகியவை இவற்றை நடத்த நகர்ப்புற உள்ளாட்சி அமைப்புகள் மற்றும் மாவட்ட நிர்வாகங்களின் இணையதளங்களில் ஆன்லைனில் விண்ணப்பிக்கலாம் என்று கூறப்பட்டுள்ளது.
