வளர்ந்து வரும் பொருளாதார சக்தி மற்றும் முக்கியமான புவிசார் அரசியல் நாடான இந்தியாவுடன் நெருக்கமான உறவுகளை உருவாக்குவதில் கனடா தீவிரமாக இருக்கிறது என்று அந்நாட்டு பிரதமர் ஜஸ்டின் ட்ரூடோ தெரிவித்திருக்கிறார்.
காலிஸ்தான் தீவிரவாத அமைப்பின் தலைவரும், இந்தியாவில் தேடப்படும் தீவிரவாதியாக அறிவிக்கப்பட்டவருமான ஹர்தீப் சிங் நிஜர் கடந்த ஜூன் மாதம் பிரிட்டிஷ் கொலம்பியாவிலுள்ள சீக்கிய குருத்துவாரவுக்கு முன்பு மர்ம நபர்களால் சுட்டுக் கொல்லப்பட்டார். இக்கொலைக்கு பின்னணியில் இந்திய அரசுக்கு தொடர்பு இருப்பதாக கனடா பிரதமர் ஜஸ்டின் ட்ரூடோ குற்றம்சாட்டினார். இதனால், இந்தியாவுக்கும் கனடாவுக்கும் இடையேயான இராஜதந்திர உறவில் விரிசல் ஏற்பட்டிருக்கிறது.
இந்த நிலையில், இந்தியாவுக்கு எதிரான ‘நம்பகமான குற்றச்சாட்டுகள்’ இருந்தபோதிலும், அந்நாட்டுடன் நெருக்கமான உறவுகளை உருவாக்க கனடா உறுதிபூண்டிருப்பதாக கனடா நாட்டு பிரதமர் ஜஸ்டின் ட்ரூடோ கூறியிருப்பதாக தி நேஷனல் போஸ்ட் செய்தி வெளியிட்டிருக்கிறது. மாண்ட்ரியலில் செய்தியாளர்களைச் சந்தித்த ஜஸ்டின் ட்ரூடோ, “இந்தியா வளர்ந்து வரும் பொருளாதார சக்தி மற்றும் முக்கியமான புவிசார் அரசியல் நாடு.
மேலும், கடந்தாண்டு இந்தோ-பசிபிக் மூலோபாயத்தை நாங்கள் முன்வைத்தபடி, இந்தியாவுடன் நெருக்கமான உறவுகளை உருவாக்குவதில் மிகவும் தீவிரமாக இருக்கிறோம். அதேநேரம், வெளிப்படையாக சட்டத்தின் ஆட்சி நடைபெறும் நாடாக, இந்த விஷயத்தின் (ஹர்தீப் சிங் நிஜர் கொலை) முழு உண்மைகளையும் நாங்கள் பெறுவதை உறுதி செய்ய இந்தியா, கனடாவுடன் இணைந்து பணியாற்ற வேண்டும்” என்று கூறியிருப்பதாக தெரிவிக்கப்பட்டிருக்கிறது.
இது ஒருபுறம் இருக்க, ஹர்தீப் சிங் நிஜர் கொலையில் இந்தியாவின் பங்கு குறித்து பகிரங்கமாகக் கூறப்பட்ட குற்றச்சாட்டுகளை, அமெரிக்க வெளிவிவகாரச் செயலாளர் ஆண்டனி பிளிங்கன், இந்திய வெளியுறவுத்துறை அமைச்சர் ஜெய்சங்கருடனான சந்திப்பின்போது எழுப்புவார் என்று அமெரிக்காவிடமிருந்து தனக்கு உத்தரவாதம் கிடைத்திருப்பதாகவும் ஜஸ்டின் ட்ரூடோ கூயிருந்தார். ஆனால், இச்சந்திப்பின்போது, இந்தியா-கனடா விவகாரம் குறித்து விவாதிக்கப்பட்டதாக தெரிவிக்கப்படவில்லை என்பது குறிப்பிடத்தக்கது.
