சிவகங்கை மாவட்டம் திருப்புவனம் அருகே உள்ள புதூர் பகுதியில், 10-ஆம் நூற்றாண்டைச் சேர்ந்த அரிகண்டம் சிற்பம் உள்ளிட்டவற்றைப் பாதுகாக்க வேண்டும் என்று வரலாற்று ஆய்வாளர்கள் வலியுறுத்தியுள்ளனர்.
புதூரில் இருந்து மடப்புரம் செல்லும் வழியில், 10-ஆம் நூற்றாண்டைச் சேர்ந்த அரிகண்ட சிற்பம், பல்வேறு கால கல்வெட்டு உட்பட பல சிற்பங்கள் காணப்படுகிறது. அரிகண்டம் என்பது, மன்னன் போரில் வெற்றி பெற வேண்டியோ, நோயிலிருந்து மீளவோ காளி தேவியிடம் வேண்டிக்கொண்டு போரில் வெற்றி பெற்ற பிறகு அல்லது உடல் நலம் சரியான பிறகு தன் தலையைத் தானே அரிந்து உயிர் விடுதல் ஆகும். நவகண்டம் என்பது ஒன்பது இடங்களில் வெட்டி, உடம்பை ஒன்பது கண்டங்களாக்கி உயிரைத் துறப்பது ஆகும்.
இதுகுறித்து ஆய்வாளர் காளைராஜன் கூறியதாவது, அரிகண்ட சிற்பம் காளிக்கு வேண்டுதல் நிறைவேற தன்னைத்தானே பலி கொடுத்தலை குறிப்பதாகும். அரி என்றால் நறுக்கி என்பது அர்த்தம். அரிகண்ட சிற்பம், நவகண்ட சிற்பம் என இரு வகை சிற்பங்கள் உள்ளன.
மடப்புரத்தில் பத்ரகாளியம்மன் கோவில் உள்ளதால், காளிக்கு பலி கொடுத்தல் குறித்த சிற்பமாக அரிகண்ட சிற்பம் இருக்க வாய்ப்புள்ளது. இதுதொடர்பாக, திருப்புவனகாசி என்ற நூலிலும் குறிப்பிடப்பட்டுள்ளது.
மடப்புரம் கோவிலில் அம்மனுக்கு இருபுறமும் சித்திரசரிதன், வல்லபன் என இரு சிற்பங்கள் இருந்தன. சிரித்தபடியே தன் தலையை வெட்டுவது போல காணப்படும் இந்த இரு சிற்பங்களையும், தற்போது தனி அறையில் எடுத்து வைத்து விட்டனர் என்று கூறினார்.
திருப்பாச்சேத்தியில் வாமன அவதார நிலதான கல், சூலக்கல், பல்வேறு கால கல்வெட்டுகள், புடைப்பு சிற்பங்கள் உள்ளிட்டவை திருப்புவனம் வட்டாரத்தில் தொடர்ச்சியாகக் கிடைத்து வரும் நிலையில், அவற்றைப் பாதுகாக்க தொல்லியல் துறையினர் முன்வர வேண்டும் என, வரலாற்று ஆய்வாளர்கள் வலியுறுத்தியுள்ளனர்.
