வாக்காளர்கள் அனைவரும் வாக்குரிமையை பயன்படுத்துங்கள் என பிரதமர் மோடி கேட்டுக்கொண்டுள்ளார்.
மத்தியப் பிரதேசத்தில் உள்ள 230 தொகுதிகளுக்கும் இன்று (நவம்பர் 17) ஒரே கட்டமாக வாக்குப்பதிவு நடைபெறுகிறது. இதேபோல் சத்தீஸ்கரில் உள்ள 70 தொகுதிகளுக்கு இரண்டாம் கட்ட வாக்குப்பதிவு நடைபெற்று வருகிறது.
இதுதொடர்பாக எக்ஸ் தளத்தில் பிரதமர் மோடி பதிவு ஒன்றை வெளியிட்டுள்ளார்.
மத்தியப் பிரதேசத்தின் அனைத்து சட்டமன்றத் தொகுதிகளுக்கும் இன்று வாக்குப்பதிவு நடைபெறுவதாகவும், மாநிலத்தின் ஒவ்வொரு பகுதியிலும் உள்ள வாக்காளர்கள் ஆர்வத்துடன் வாக்களித்து, இந்த மாபெரும் ஜனநாயக விழாவின் அழகை மேம்படுத்துவார்கள் என்று நம்புவதாகவும் தெரிவித்துள்ளார்.
அனைத்து இளைஞர்களுக்கும் எனது சிறப்பு வாழ்த்துக்கள் என்றும் முதல் தலைமுறை வாக்களர்களுக்கு எனது வணக்கம் என்றும் அவர் கூறியுள்ளார்.
சத்தீஸ்கர் சட்டமன்றத் தேர்தலில் இன்று இரண்டாவது மற்றும் கடைசி சுற்று வாக்குப்பதிவு நடைபெறுவதை குறிப்பிட்டுள்ள பிரதமர் மோடி, அனைத்து வாக்காளர்களும் தங்கள் வாக்குரிமையைப் பயன்படுத்துமாறு கேட்டுக்கொள்கிறேன் என கூறியுள்ளார்.
உங்கள் ஒவ்வொரு வாக்கும் ஜனநாயகத்திற்கு மதிப்புமிக்கது என்றும் பிரதமர் தெரிவித்துள்ளார்.
