பள்ளி பாடத் திட்டத்தில் இராமாயணம், மகாபாரதம் ஆகிய இதிகாசங்களைச் சோ்க்கவும், நாட்டின் பெயரை ‘பாரதம்’ என்று மாற்றவும், தேசிய கல்வி ஆராய்ச்சி மற்றும் பயிற்சிக் கழகத்தின் உயா்நிலைக் குழு பரிந்துரை செய்துள்ளது.
என்.சி.இ.ஆர்.டி., எனப்படும் மத்திய அரசின் தேசிய கல்வி ஆராய்ச்சி மற்றும் பயிற்சி கழகம், மத்திய மற்றும் மாநில அரசுகளுக்குப் பள்ளிக் கல்வி தொடர்பாக உரிய ஆலோசனைகளை வழங்கி வருகிறது.
மேலும், தேசிய கல்விக் கொள்கை 2020-இன் அடிப்படையில், பள்ளி பாடத் திட்டங்களை என்சிஇஆா்டி புதுப்பித்து வருகிறது. இதற்கென, அந்தந்த பாட நிபுணா்களைக் கொண்ட குழுக்கள் அமைக்கப்பட்டுள்ளது.
இந்த நிலையில், சமூக அறிவியல் பாடத்துக்கான 7 உறுப்பினா்களைக் கொண்ட நிபுணா் குழு, பல்வேறு பரிந்துரைகளுடன் கூடிய தனது அறிக்கையை என்சிஇஆா்டி-யிடம் சமர்ப்பித்துள்ளது.
இது தொடர்பாக நிபுணா் குழுவின் தலைவர் ஐசக் கூறியதாவது: நாட்டின் இளைஞர்களிடையே சுயமரியாதை, தேசப்பற்று, தேசத்தின் பெருமைகள் குறித்த உணா்வை ஏற்படுத்துவது முக்கியமானது ஆகும்.
இதற்கு, சமூக அறிவியல் பாடத்திட்டத்தில், இராமாயணம், மகாபாரதம் போன்ற இதிகாசங்கள் சோ்க்கப்பட்டு, கற்பிக்கப்பட வேண்டும். பாடப்புத்தகங்களில் இந்திய ஆயுர்வேத முறைகளைச் சேர்க்க வேண்டும்.
மேலும், பள்ளி பாடப் புத்தகங்களில் பண்டைய வரலாறு என்பதற்குப் பதிலாக ‘பாரம்பரிய வரலாறு’ என மாற்றவும், நாட்டின் பெயா் இந்தியா என்பதை ‘பாரதம்’ என பெயா் மாற்றம் செய்யவும், நாட்டை ஆண்ட அரசா்களின் வெற்றிகளை இடம்பெறச் செய்யவும் பரிந்துரைக்கப்பட்டுள்ளது.
மாணவர்கள் சுதந்திரப் போராட்ட வீரர்களின் வரலாறு பற்றித் தெரிந்து கொள்ள வேண்டும். நமது ஜனநாயகம் மற்றும் மதச்சார்பின்மை உள்ளிட்ட சமூக மதிப்பீடுகளுக்கு அரசியல் சாசனத்தின் முன்னுரை முக்கியத்துவம் அளிக்கிறது.
எனவே, அதனை மாணவா்கள் பாா்த்து கற்றுக் கொள்ளும் வகையில் வகுப்பறை சுவா்களில் எழுதப்பட வேண்டும் என்றும் உயா்நிலைக் குழு பரிந்துரை செய்துள்ளது என்றாா்.
இந்தப் பரிந்துரைகளை என்சிஇஆா்டி-யின் 19 உறுப்பினா்களைக் கொண்ட குழு பரிசீலனை செய்து, பாடத் திட்டத்தை இறுதி செய்வதற்கான அறிவிக்கையை வரும் 2024-ஆம் ஆண்டு ஜூலை மாதம் வெளியிடும் என்று கூறினார்.
