இந்தியா – ஆஸ்திரேலியா டி20 தொடர் நடைபெறவுள்ள சத்தீஸ்கர் ராய்ப்பூர் மைதானத்தில் 2009 ஆம் ஆண்டு முதல் மின் கட்டணம் கட்டப்படாமல் ரூ.3.16 கோடி நிலுவை வைத்துள்ளதாக தகவல் வெளியாகியுள்ளது.
இந்தியா மற்றும் ஆஸ்திரேலியா அணிகளுக்கு இடையேயான 5 போட்டிகள் கொண்ட டி20 தொடரில் இன்று நான்காவது போட்டி ராய்ப்பூரில் உள்ள ஷஹீத் வீர் நாராயண் சிங் மைதானத்தில் நடைபெறுகிறது.
அந்த மைதானத்தில் 2009 ஆம் ஆண்டு முதல் மின் கட்டணம் கட்டப்படாமல் ரூ.3.16 கோடி நிலுவை வைத்துள்ளதாக தகவல் வெளியாகியுள்ளது. தற்காலிக மின் இணைப்பு கொடுக்கப்பட்டாலும், அது போதுமானதாக இல்லாமல், கூடுதல் மின் திறன் கோரி விண்ணப்பித்தும் இன்னும் பணிகள் துவங்காததால், போட்டி நடைபெறுவதில் சிக்கல் ஏற்பட்டுள்ளது.
கடந்த 2009ம் ஆண்டு முதல் அந்த மைதானத்திற்கான மின் கட்டணம் (ரூ.3.16 கோடி) செலுத்தப்படாமல் இருந்துள்ளது. இதனால் 5 ஆண்டுகளுக்கு முன்பு மைதானத்தில் மின் இணைப்பு துண்டிக்கப்பட்டது.
இதையடுத்து சத்தீஸ்கர் மாநில கிரிக்கெட் சங்கம் வேண்டுகோளின்படி மைதானத்தில் தற்காலிக இணைப்பு கொடுக்கப்பட்டது. அதன் மூலம் போட்டிகள் நடத்தப்பட்டன.
இன்றையப் போட்டியில் மின்தேவை அதிகரித்திருப்பதால், 200 கிலோ வோல்ட்ஸ் ஆக உள்ள தற்காலிக மின் இணைப்பின் திறனை ஆயிரம் கிலோ வோல்ட் ஆக அதிகரிக்க
அம்மாநில கிரிக்கெட் சங்கம் விண்ணப்பித்துள்ளது. இந்த விண்ணப்பம் ஏற்கப்பட்டாலும், அதற்கான பணிகள் இன்னும் துவங்கப்படவில்லை. இதனால், இன்றையப் போட்டி நடைபெறுவதற்குள் மின்சார தேவைகள் பூர்த்தியாகி, போட்டி சிக்கலின்றி நடைபெறுமா என்ற கேள்வி எழுந்துள்ளது.
