லஞ்ச அமலாக்கத்துறை அதிகாரி : காவலில் எடுத்து விசாரிக்க முடிவு!!

லஞ்சம் வாங்கிய விவகாரத்தில் கைது செய்யப்பட்ட அமலாக்கத்துறை அதிகாரி அங்கிட் திவாரியை 5 நாட்கள் காவலில் எடுத்து விசாரிக்க லஞ்ச ஒழிப்புத்துறை போலீஸார் முடிவு செய்திருக்கிறார்கள்.

மத்தியப் பிரதேச மாநிலம் போபாலைச் சேர்ந்தவர் அங்கிட் திவாரி. கடந்த 2018-ம் ஆண்டு உதவி அமலாக்கத்துறை அதிகாரியாக பணியில் சேர்ந்த இவர், பதவி உயர்வு பெற்று கடந்த ஏப்ரல் மாதம் மதுரை தபால் தந்தி நகரில் உள்ள அமலாக்கத்துறை துணை இயக்குனர் அலுவலகத்தில் பணியில் சேர்ந்தார்.

விசாரணை அதிகாரி அந்தஸ்தில் இருந்த இவர், காலங்கரை எம்.என்.நகரில் வாடகைக்கு வீடு எடுத்து தங்கி இருக்கிறார். இவர், திண்டுக்கல் அரசு மருத்துவக் கல்லூரி டாக்டர் சுரேஷ்பாபுவின் சொத்துக் குவிப்பு வழக்கு தொடர்பாக, மேல்விசாரணை நடத்தாமல் இருக்க கடந்த நவம்பர் 1-ம் தேதி 20 லட்சம்  லஞ்சம் பெற்றார்.

தொடர்ந்து, 2-வது தவணையாக டாக்டர் சுரேஷ்பாபுவிடம் இருந்து மேலும் 20 லட்சம் ரூபாய் லஞ்சம் பெறும்போது லஞ்ச ஒழிப்புத்துறை அதிகாரிகள் கையும், களவுமாக அங்கித் திவாரியை கைது செய்தனர். இதையடுத்து, அங்கிட் திவாரி நீதிமன்றத்தில் ஆஜர்படுத்தப்பட்டு, 15 நாட்கள் காவலில் திண்டுக்கல் சிறையில் அடைக்கப்பட்டார்.

இதைத் தொடர்ந்து, அங்கிட் திவாரி பணிபுரியும் மதுரை அமலாக்கத்துறை துணை இயக்குனர் அலுவலகத்திலும், மதுரையில் உள்ள அவரது வீட்டிலும் லஞ்ச ஒழிப்புத்துறை அதிகாரிகள் அதிரடியாக சோதனை நடத்தினர். மாலை 6 மணிக்கு தொடங்கிய சோதனை, நேற்று காலை 7 மணி வரை என 13 மணி நேரம் நடந்தது.

பெண் ஊழியர்கள் மட்டும் வீடு திரும்ப அனுமதிக்கப்பட்டனர். இதன் பின்னர் அமலாக்கத்துறை அலுவலகம் மூடப்பட்டது. இந்த சூழலில், அங்கிட் திவாரியை 5 நாட்கள் போலீஸ் காவலில் எடுத்து விசாரிக்க லஞ்ச ஒழிப்பு போலீஸார் முடிவு செய்திருக்கிறார்கள்.

இது தொடர்பாக, லஞ்ச ஒழிப்பு போலீஸார் கூறுகையில், “அங்கிட் திவாரியிடம் பல்வேறு கோணங்களில் விசாரணை நடத்தி தகவல்கள் சேகரிக்கப்பட்டிருக்கின்றன. மேலும், அங்கிட் திவாரி லஞ்சம் வாங்குவதற்கு சில உயர் அதிகாரிகள் உடந்தையாக இருந்திருக்கிறார்கள்.

இந்த அதிகாரிகளுக்கு பெரிய தொகையைக் குறிவைத்து லஞ்ச பேரம் பேசுவது வாடிக்கையாக இருந்திருக்கிறது. லட்சக்கணக்கில் லஞ்சமாக வாங்கும் பணத்தை 7 அதிகாரிகள் பங்கு போட்டுக்கொண்டிருப்பது தெரியவந்திருக்கிறது. எனவே, இவர்கள் பற்றிய விவரங்களை சேகரிக்கவும் இச்சோதனை உதவி இருக்கிறது.

அந்த அதிகாரிகளுக்கும் விரைவில் சம்மன் அனுப்பி விசாரணை நடத்த முடிவு செய்திருக்கிறோம். முழுமையான விசாரணைக்குப் பின்னரே இதுகுறித்த மற்ற தகவல்களை தெரிவிக்க முடியும். இதனிடையே, அங்கிட் திவாரியை காவலில் எடுத்து விசாரிக்க முடிவு செய்திருக்கிறோம். இதற்காக நாளை மனுத் தாக்கல் செய்யப்படும்” என்றார்.