செம்பரம்பாக்கம், புழல் ஏரிகளுக்கு நீர்வரத்து குறைந்து உள்ளதால், ஏரிகளில் இருந்து திறந்து விடப்படும் நீரின் அளவு குறைக்கப்பட்டுள்ளது.
வங்கக் கடலில் நிலவி வந்த ஆழ்ந்த காற்றழுத்த தாழ்வு மண்டலம் மிக்ஜாம் புயலாக மாறியது. இதனால், சென்னை, திருவள்ளூர், செங்கல்பட்டு மற்றும் காஞ்சிபுரம் உள்ளிட்ட பல்வேறு இடங்களில் கடந்த சில நாட்களாக கனமழை வெளுத்து வாங்கியது. அதனைத் தொடர்ந்து தெற்கு ஆந்திரா கடற்கரையை ஒட்டியுள்ள பாபட்லாவிற்கு அருகே கடந்த 5-ஆம் தேதி மிக்ஜாம் புயல் கரையைக் கடந்தது.
இதனால், சென்னை மாநகருக்குக் குடிநீர் வழங்கும் பூண்டி, சோழவரம், புழல், கண்ணன்கோட்டை தேர்வாய்கண்டிகை, செம்பரம்பாக்கம் மற்றும் வீராணம் ஆகிய 6 ஏரிகளின் நீர்மட்டம் வேகமாக உயர்ந்தது.
அந்த வகையில், 24 அடி நீா் உயரம் கொண்ட செம்பரம்பாக்கம் ஏரியின் நீா்மட்டம் 23.45 அடியாக உள்ளது. நேற்று ஏரிக்கு வரும் நீரின் அளவு 8 ஆயிரத்து 514 கனஅடியாக இருந்த நிலையில், இன்று 4 ஆயிரத்து 166 கன அடியாக குறைந்துள்ளது. இதனை அடுத்து ஏரியில் இருந்து வினாடிக்கு 6 ஆயிரம் கன அடி தண்ணீர் வெளியேற்றப்பட்டு வந்த நிலையில், 4 ஆயிரம் கன அடியாக குறைக்கப்பட்டுள்ளது.
இதேபோல், புழல் ஏரியில் இருந்து வெளியேற்றப்படும் உபரி நீரின் அளவானது, 6 ஆயிரம் கன அடியிலிருந்து, வினாடிக்கு ஆயிரத்து 189 கனஅடியாக குறைக்கப்பட்டுள்ளது.
