‘ஸ்ட்ரீட் பிரிமியர் லீக்’ தொடரில் விளையாட உள்ள அணிகளுக்கு உரிமையாளர்களாக சினிமா நடிகர்கள் அணிகளை வாங்கியுள்ளனர்.
கிரிக்கெட் விளையாட்டுப் போட்டியின் அடுத்த கட்டமாக ‘ஸ்ட்ரீட் பிரிமியர் லீக்’ தொடங்கியுள்ளது. ‘ஸ்ட்ரீட் பிரிமியர் லீக் என்பது இந்தியாவின் முதல் டென்னிஸ் பந்து டி10 கிரிக்கெட் போட்டியாகும்.
ஐபிஎல் கிரிக்கெட் போன்றே இதற்கும் தனித்தனி அணிகள் உண்டு. தனித்தனி உரிமையாளர்கள் உண்டு. அதில் ஐதராபாத் அணியைத் தெலுங்கு நடிகர் ராம் சரண் வாங்கி உள்ளார். அக்ஷய் குமார் ஸ்ரீநகர்(காஷ்மீர்) அணியையும், ரித்திக் ரோஷன் பெங்களூரு அணியையும், அமிதாப்பச்சன் மும்பை அணியையும் வாங்கி உள்ளனர்.
இதன் முதல் சீசன் 2024 ஆம் ஆண்டு மார்ச் 2ஆம் தேதி முதல் 9ஆம் தேதி வரை இந்தியாவின் முக்கியமான நகரங்களான மும்பை, ஐதராபாத், பெங்களூரு, சென்னை, கொல்கத்தா, ஸ்ரீநகர் ஆகிய இடங்களில் 6 அணிகளுக்கு இடையேயான 19 போட்டிகளாக நடைபெறுகிறது.
மேலும் இதுகுறித்து அணியின் உரிமையாளர்கள் தங்களின் கருத்துகளைப் பகிர்ந்துள்ளனர். அதில் மும்பை அணியின் உரிமையாளர் நடிகர் அமிதாப் பச்சன் தனது எக்ஸ் பக்கத்தில், ” தெருக்களில் தங்கள் திறமையை வெளிப்படுத்தி கிரிக்கெட் விளையாடி வந்தவர்களுக்கு, இப்போது தொழில்ரீதியாக ஒரு அணியில் தேர்ந்தெடுக்கப்பட்டு, உலகெங்கிலும் உள்ள மில்லியன் கணக்கானவர்களுக்கு முன்பு தங்கள் திறமையை வெளிப்படுத்த ஒரு வாய்ப்பு கிடைத்துள்ளது” என்று பதிவிட்டுள்ளார்.
அவரைத் தொடர்ந்து ஐதராபாத் அணியின் உரிமையாளர் ராம் சரண், ” ஐஎஸ்பிஎல் யின் ஒரு பகுதியாக இருப்பதில் நான் மகிழ்ச்சியடைகிறேன். இது கிரிக்கெட் சார்ந்த பொழுது போக்கை மறுவரையறை செய்வதை உறுதியளிக்கிறது.
ஐதராபாத் எப்போதும் விதிவிலக்கான கிரிக்கெட் திறமையாளர்களின் மையமாக இருந்து வருகிறது. இந்த லீக் போட்டி எங்களுடைய உள்ளூர் வீரர்களுக்கு தேசிய அளவிலான அரங்கத்தில் பிரகாசிக்க ஒரு அருமையான தளத்தை வழங்குகிறது. ஐதராபாத் அணியை வழிநடத்தவும், நகரத்தின் கிரிக்கெட் திறமையை இது போன்ற பெரிய போட்டிகளில் வெளிக்கொண்டுவர நான் உற்சாகமாக இருக்கிறேன்” என்று கூறினார்.
