பூகம்பத்தால் பாதிக்கப்பட்ட ஜப்பானுக்கு சாத்தியமான அனைத்து உதவிகளையும் செய்ய தயார் என அந்நாட்டு பிரதமர் ஃபுமியோ கிஷிடாவுக்கு மோடி கடிதம் எழுதியுள்ளார்.
ஜாப்பான் நாட்டின் இஷிகாவா தீவு அருகே கடல் பகுதியில் கடந்த ஒன்றாம் தேதி பயங்கர பூகம்பம் ஏற்பட்டது. ரிக்டர் அளவில் 7.6 புள்ளியாக பதிவான இந்த பூகம்பம் பல்வேறு பகுதிகளில் கடும் சேதத்தை ஏற்படுத்தியது.
இதனைத்தொடர்ச்சியாக 20க்கும் மேற்பட்ட முறை நில அதிர்வு ஏற்பட்டது. குடியிருப்புகள், வணிகக் கட்டடங்கள் குலுங்கின. அச்சமடைந்த மக்கள் சாலைகளில் தஞ்சம் புகுந்தனர்.
கட்டிட இடிபாடுகளில் சிக்கியுள்ளவர்களை மீட்கும் பணி தொடர்ந்த நடைபெற்று வருகிறது. தற்போது வரை 92 பேரில் உடல்கள் மீட்கப்பட்டுள்ளன. 242 பேர் மாயமாகியுள்ளனர். காயம் அடைந்தவர்களுக்கு மருத்துவமனைகளில் தீவிர சிகிச்சை அளிக்கப்பட்டு வருகிறது. மீட்புப்பணிகள் தொடர்ந்து நடைபெற்று வரும் நிலையில், உயிரிழப்பு அதிகரிக்கக்கூடும் என அஞ்சப்படுகிறது.
இந்நிலையில் ஜப்பான் பூகம்பத்தில் உயிரிழந்தோரின் குடும்பத்தினருக்கு பிரதமர் மோடி இரங்கல் தெரிவித்துள்ளார். இதுதொடர்பாக ஜப்பான் பிரதமருக்கு மோடி கடிதம் ஒன்றையும் எழுதியுள்ளார்.
அதில், ஜப்பானுடனான தனது உறவை உலகளாவிய பங்காளியாக இந்தியா மதிக்கிறது. இந்த நேரத்தில் சாத்தியமான அனைத்து உதவிகளையும் வழங்க இந்தியா தயாராக உள்ளதாக பிரதமர் மோடி தெரிவித்துள்ளார்.
