எல்லை தாண்டி மீன்பிடித்ததாக கூறி இலங்கை கடற்படையால் கைது செய்யப்பட்ட தமிழக மீனவர்கள், மத்திய அரசின் தீவிர முயற்சியால் விடுதலை செய்யப்பட்ட நிலையில், இன்று சென்னை வந்தடைந்தனர். அவர்களை தமிழக பாஜக நிர்வாகிகள் சால்வை வரவேற்றனர்.
கடந்த டிசம்பர் 6-ஆம் தேதி இராமேஸ்வரத்தை சேர்ந்த 8 மீனவர்கள் கடலில் மீன்பிடித்துக் கொண்டிருந்த போது, எல்லை தாண்டி மீன்பிடித்ததாகக் கூறி, இலங்கை கடற்படையினர் கைது செய்தனர். இதேபோல, புதுக்கோட்டையைச் சேர்ந்த மொத்தம் 13 மீனவர்களை இலங்கை கடற்படையினர் கைது செய்தனர். மேலும், அவர்களது படகுகள் மற்றும் மீன்பிடி வலைகளும் இலங்கை கடற்படையினரால் கைப்பற்றப்பட்டன. கைது செய்யப்பட்ட மீனவர்கள், இலங்கையில் உள்ள நீதிமன்றத்தில் ஆஜர்படுத்தி சிறையில் அடைத்தனர்.
இதனை அடுத்து தமிழக மீனவர்களை மீட்க பாரத பிரதமர் நரேந்திர மோடி தலைமையிலான மத்திய அரசு தீவிர முயற்சிகளை மேற்கொண்டது.
இலங்கையில் உள்ள இந்திய தூதரக அதிகாரிகள் நடத்திய பேச்சுவார்த்தையைத் தொடர்ந்து இராமேஸ்வரம் மற்றும் புதுக்கோட்டையைச் சேர்ந்த 21 மீனவர்கள் விடுவிக்கப்பட்டனர். இலங்கையில் உள்ள இந்திய தூதரக அதிகாரிகள் மீனவர்களைத் தமிழகம் அனுப்ப ஏற்பாடு செய்தனர். அதன்படி, நேற்று மதியம் கொழும்பில் இருந்து விமானத்தில் புறப்பட்ட மீனவர்கள் சென்னை வந்தடைந்தனர். சென்னை விமான நிலையத்தில், தமிழக பாஜக நிர்வாகிகள் மீனவர்களுக்கு சால்வை அணிவித்து வரவேற்றனர்.
தமிழக மீனவர்களை மீட்க தீவிர முயற்சி மேற்கொண்ட, பாரத பிரதமர் நரேந்திர மோடி தலைமையிலான மத்திய அரசுக்கு மீனவர்கள் நன்றி தெரிவித்தனர்.
