ஐக்கிய அரபு எமிரேட்ஸில் வழக்கத்திற்கு மாறாக வெளுத்து வாங்கிய கனமழைக்கு 18 பேர் பலியாகியுள்ளனர். கடந்த 75 வருடங்களாக இல்லாதஅளவு பெருமழை கொட்டித்தீர்த்துள்ளது. இதற்கு, காரணம் என்ன? இந்த செய்தி தொகுப்பில் காணலாம்.
ஐக்கிய அரபு அமீரகத்தில் உள்ள துபாய் நகரம் கடற்கடையை ஓட்டி உள்ளது. வறண்ட நிலப்பகுதியான இங்கு 12 மணி நேரத்தில் 100 மில்லி மீட்டர் மழை பெய்துள்ளது. இது ஓராண்டு பெய்யக் கூடிய மழை அளவாகும். கடந்த 75 ஆண்டுகளாக இல்லாத அளவு மழை பெய்துள்ளது.
கடந்த 15-ம் தேதி முதல் ஐக்கிய அரபு அமீரகம் மற்றும் பக்ரைனில் புயலுடன் பெய்த கனமழை காரணமாக ஏற்பட்ட வெள்ளப்பெருக்கில் சிக்கி 18 பேர் பலியாகியுள்ளனர். பொது மக்கள் யாரும் வீட்டை விட்டு வெளியே வர வேண்டாம் என அந்நாட்டு வானிலை ஆய்வு மையங்கள் எச்சரிக்கை விடுத்துள்ளன. அந்த அளவு நிலைமை விபரீதமாகியுள்ளது.
குறிப்பாக, துபாயிலிருந்து 100 கிலோ மீட்டர் தொலைவில் உள்ள அன்-ஐன் பகுதியில் 24 மணி நேரத்தில் 256 மில்லி மீட்டர் மழை பொழிந்துள்ளது. வருடாந்திர மழை அளவைவிட இது 30 சதவீதம் அதிகம் என்கின்றனர். அதாவது, 1949-ல் பெய்த மழையை விட அதிகமாகும்.
மேலும், பெருமழை காரணமாக, துபாயில் இரண்டாவது நாளாக விமான சேவை ரத்து செய்யப்பட்டுள்ளது. 290 விமானங்கள் ரத்து செய்யப்பட்டுள்ளன. 440 விமானங்கள் தாமதமாகியுள்ளது. இதனால், பயணிகள் பல்வேறு விமான நிலையங்களில் முகாமிட்டுள்ளனர்.
துபாய், பக்ரைனில் உள்ளிட்ட பகுதிகளில் தாழ்வான பகுதிகளில் வெள்ளம் கரைபுரண்டு ஓடியது. சாலைகளில் வாகனங்கள் தண்ணரீரில் அடித்துச் செல்லப்பட்டன. பாலைவனங்களில் வெள்ளம் பெருக்கெடுத்து ஓடியதில். ஓட்டகம் உள்ளிட்ட உயினங்கள் தண்ணீரில் அடித்துச் செல்லப்பட்டன.
ஐக்கிய அரபு அமீரகம் மிகவும் வறண்ட பகுதிகளை கொண்டதால், செயற்கை மழை உருவாக்கப்படுகிறது என்றும், மேக விதைப்பு மூலம் மழையை அதிகப்படுத்தி இருக்கலாம் என்கிறது ஏ.பி செய்தி நிறுவனம். ஆனால், பருவகால மாற்றம் தான் காரணம் என்கின்றனர் அங்குள்ள வல்லுநர்கள். மேலும், எல் நினோ மற்றம் லா நினா போன்றவையே காரணம் என்று வாதாடுபவர்களும் இருக்கின்றனர்.
மேலும், தொடர்ந்து பெட்ரோல், டீசல், நிலக்கரியை எரிப்பதன் மூலம் காலநிலை தொடர்ந்து வெப்பம் அடைந்து மழை பொழிவு தொடர்ந்து அதிகரித்து வருகிறது. இந்த நிலை தொடர்ந்தால், மழை வெள்ளத்தால் மக்கள் உயிரிழக்கும் கொடூரம் தொடரும் என்கிறார் லண்டன் இம்பீரியல் கல்லூரி கால நிலை அறிவியல் மூத்த விரைவுயாளர் ஃப்ரீடெரிக் ஓட்டோ.
ஆய்வுகள் அனைத்தும் மனித தவறுகளே காரணம் என சொல்லாமல் சொல்கிறது. என்ன செய்யப்போகிறது மனிதக் குலம்?
