திமுக ஆட்சிப் பொறுப்பேற்ற மூன்றாண்டுகளில் ஒரு மின்சாரப் பேருந்தை கூட வாங்காத நிலையில், நிதிநிலை அறிக்கையில் ஒதுக்கப்பட்ட நிதி எங்கே என அமமுக பொதுச்செயலாளர் டிடிவி தினகரன் கேள்வி எழுப்பியுள்ளார்.
தமிழ் ஜனம் தொலைக்காட்சியின் செய்தியைச் சுட்டிக்காட்டி சமூக வலைதளத்தில் அவர் வெளியிட்டுள்ள பதிவில், ஒவ்வொரு ஆண்டு நிதிநிலை அறிக்கையிலும் புதிய பேருந்துகளை வாங்குவதற்காக ஆயிரக்கணக்கான கோடி ரூபாய் நிதியை திமுக அரசு ஒதுக்கி வருவதாகவும்,
கடந்த மூன்றாண்டுகளில் 892 பேருந்துகள் மட்டுமே வாங்கியிருப்பதாக தகவல் அறியும் உரிமைச் சட்டத்தின் கீழ் பெறப்பட்டுள்ள தகவலில் உறுதியாகி உள்ளதாகவும் தெரிவித்துள்ளார்.
அரசுப் பேருந்துகள் ஆங்காங்கே பழுதாகி நிற்பதும், ஓடிக் கொண்டிருக்கும் போதே அதன் பாகங்கள் கழண்டு விழுவதும் தொடர் கதையாகி வருகின்றன எனக்கூறியுள்ள அவர்,
பேருந்துகளில் பயணிக்கக் கூடிய பொதுமக்களின் உயிர் பாதுகாப்பு கேள்விக்குறியாகியுள்ளது என குறிப்பிட்டுள்ளார்.
புதிய பேருந்துகளை வாங்க எந்தவித நடவடிக்கையும் எடுக்காத திமுக அரசின் அலட்சியப்போக்கு கடும் கண்டனத்திற்குரியது என கூறியுள்ளார்.
கடந்த 3 ஆண்டுகளாக நிதிநிலை அறிக்கையில் ஒதுக்கப்பட்ட நிதி எங்கே சென்றது என கேள்வி எழுப்பியுள்ள அவர்,
போக்குவரத்துத்துறையில் நிகழும் நிர்வாக சீர்கேடுகளை களைந்து உடனடியாக புதிய பேருந்துகளை வாங்க தமிழக அரசு நடவடிக்கை எடுக்க வேண்டும் எனவும் அவர் வலியுறுத்தியுள்ளார்.
