ஜம்மு காஷ்மீர் சட்டசபைக்கான முதற்கட்ட தேர்தல் அமைதியாக நடந்து முடிந்த நிலையில், 61 புள்ளி 11 சதவீத வாக்குகள் பதிவாகியுள்ளன.
90 சட்டமன்ற தொகுதிகளைக் கொண்ட ஜம்மு காஷ்மீரின் முதற்கட்ட வாக்குப்பதிவில் 24 தொகுதிகளுக்கு தேர்தல் நடைபெற்றது. காஷ்மீரின் 16 தொகுதிகள் மற்றும் ஜம்முவின் 8 தொகுதிகளுக்கு நடைபெற்ற வாக்குப்பதிவில் 23 புள்ளி 27 லட்சம் வாக்காளர்கள் வாக்கு அளிக்க தகுதி பெற்றிருந்தனர்.
இவர்களில் 1 புள்ளி 23 லட்சம் முதல்முறை வாக்காளர்கள், 60 மூன்றாம் பாலினத்தவர் மற்றும் 29 ஆயிரத்து 309 மாற்றுத்திறனாளிகள் அடங்குவர். முதற்கட்ட வாக்குப்பதிவில் மொத்தம் 61 புள்ளி11 சதவீத வாக்குகள் பதிவாகி உள்ளதாக தலைமைத் தேர்தல் அதிகாரி பி.கே.போல் தெரிவித்துள்ளார்.
கிஷ்த்வாரில் அதிகபட்சமாக 80 புள்ளி 14 சதவீதமும், குறைந்தபட்சமாக புல்வாமாவில் 46 புள்ளி 65 சதவீத வாக்குகளும் பதிவாகியுள்ளது குறிப்பிடத்தக்கது.
