ஆம்ஸ்ட்ராங் கொலை வழக்கில் கைது செய்யப்பட்ட 3 பேரின் ஜாமீன் மனுக்களை தள்ளுபடி செய்து சென்னை முதன்மை அமர்வு நீதிமன்றம் உத்தரவிட்டுள்ளது.
பகுஜன் சமாஜ் கட்சியின் மாநில தலைவராக இருந்த ஆம்ஸ்ட்ராங் கடந்த ஜூலை மாதம் 5-ந் தேதி வெட்டிப் படுகொலை செய்யப்பட்டார்.
இந்த வழக்கு தொடர்பாக இதுவரை 28 பேர் கைது செய்யப்பட்டு அவர்களுக்கு எதிராக சென்னை எழும்பூர் நீதிமன்றத்தில் குற்றப்பத்திரிகையும் தாக்கல் செய்யப்பட்டது.
இந்நிலையில், இந்தக் கொலை வழக்கில் கைதான விக்னேஷ்குமார், விஜயகுமார், சதீஷ்குமார் ஆகிய 3 பேர் தங்களுக்கு ஜாமீன் வழங்கக்கோரி சென்னை முதன்மை அமர்வு நீதிமன்றத்தில் மனு தாக்கல் செய்திருந்தனர்.
இந்த ஜாமின் மனு மீதான விசாரணை நீதிபதி கார்த்திகேயன் முன்பு வந்தது. அப்போது காவல்துறை தரப்பில் ஆஜரான வழக்கறிஞர் தேவராஜன், மனுதரார்கள் 3 பேரும் வெடிகுண்டு உள்ளிட்ட பயங்கர ஆயுதங்கள் வைத்திருந்தாகவும் இவர்கள் குண்டர் தடுப்புச் சட்டத்தில் கைது செய்து சிறையில் அடைக்கபட்டுள்ளதால் ஜாமீன் வழங்க கூடாது எனவும் எதிர்ப்பு தெரிவித்தார்.
அப்போது மனுதாரர்கள் தரப்பில், தங்களுக்கும் கொலை சம்பவத்துக்கும் எந்த தொடர்பு இல்லை எனவும் தங்களுக்கு ஜாமீன் வழங்க வேண்டும் எனவும் கோரிக்கை வைக்கப்பட்டது.
இருதரப்பு வாதங்களையும் கேட்ட நீதிபதி கார்த்திகேயன், மனுதரார்கள், குண்டர் தடுப்புச் சட்டத்தின் கீழ் கைது செய்யபட்டுள்ளதால் தற்போதைய நிலையில் ஜாமீன் வழங்க முடியாது என கூறி 3 பேரின் மனுக்களையும் தள்ளுபடி செய்து உத்தரவிட்டார்.
