அவதூறு வழக்கில் இருந்து விடுவிக்கக் கோரி அதிமுக பொதுச்செயலாளர் எடப்பாடி பழனிசாமி தாக்கல் செய்த மனுவை ஏற்கக்கூடாது என ஆட்சேபம் தெரிவித்து திமுக எம்.பி தயாநிதிமாறன் தரப்பில் எம்.பி, எம்.எல்.ஏ-க்கள் நீதிமன்றத்தில் மனுத்தாக்கல் செய்யப்பட்டுள்ளது.
மக்களவைத் தேர்தல் பிரசாரத்தின்போது தமக்கு எதிராக உண்மைக்கு புறம்பான குற்றச்சாட்டுகளை தெரிவித்ததாகக் கூறி, அதிமுக பொதுச்செயலாளர் எடப்பாடி பழனிசாமி மீது திமுக எம்.பி தயாநிதிமாறன் அவதூறு வழக்கு தொடர்ந்தார்.
இந்த வழக்கில் இருந்து தம்மை விடுவிக்கக்கோரி பி.என்.எஸ்.எஸ் சட்டத்தின் கீழ் எடப்பாடி பழனிசாமி தரப்பில் எம்.பி, எம்.எல்.ஏ-க்கள் நீதிமன்றத்தில் மனுத்தாக்கல் செய்யப்பட்டது. இந்நிலையில், இந்த மனு விசாரணைக்கு உகந்ததல்ல என குறிப்பிட்டு தயாநிதிமாறன் தரப்பில் பதில்மனு தாக்கல் செய்யப்பட்டுள்ளது.
அதில், பாரதிய நகரிக் சுரக்ஷா சன்ஹிதா என்னும் புதிய குற்றவியல் சட்டம் அமலுக்கு வரும் முன்பே இந்த அவதூறு வழக்கு தாக்கல் செய்யப்பட்டுள்ளதாக தெரிவிக்கப்பட்டுள்ளது. எனவே, அவதூறு வழக்கில் இருந்து விடுவிக்கக்கோரி பி.என்.எஸ்.எஸ். சட்டத்தின் கீழ் எடப்பாடி பழனிசாமி தரப்பில் தாக்கல் செய்யப்பட்ட மனுவை ஏற்கக்கூடாது எனவும் தெரிவிக்கப்பட்டுள்ளது.
மேலும், குற்றச்சாட்டுகள் குற்றஞ்சாட்டப்பட்டவருக்கு வாசித்து காட்டப்பட்டுவிட்டதால், வழக்கில் இருந்து விடுவிக்க கோர முடியாது எனவும் மனுவில் குறிப்பிடப்பட்டுள்ளது.
அதனைத் தொடர்ந்து, அவதூறு வழக்கு தொடர்பான விசாரணையை டிசம்பர் 2-ம் தேதிக்கு ஒத்திவைத்து சிறப்பு நீதிமன்றம் உத்தரவிட்டது.
