தமிழகத்தில் சாலை போக்குவரத்து திட்டங்களுக்காக பல கோடி ரூபாய் நிதி ஒதுக்கீடு செய்யப்பட்டுள்ளதாக மத்திய அரசு தெரிவித்துள்ளது.
மத்திய சாலை போக்குவரத்து துறை அமைச்சர் நிதின் கட்கரி வெளியிட்டுள்ள பதிவில், ஈரோடு மாவட்டத்தில் சுமார் 3 கிலோ மீட்டர் தூரம் உயர்மட்டம் பாலம் உட்பட மாநில நெடுஞ்சாலையை விரிவுப்படுத்த 36 கோடியே 45 லட்சம் ரூபாய் ஒதுக்கப்பட்டுள்ளதாக தெரிவித்துள்ளார்.
திருப்பூர் மாவட்டத்தில், மேட்டுக்கடை – மூத்தம்பாளையம் சாலையை விரிவுபடுத்த 6 கோடியே 85 லட்சம் ரூபாயும், மதுரை மாவட்டத்தில் உள்ள மாநில நெடுஞ்சாலை 154-ஐ விரிவுப்படுத்த 18 கோடியே 29 லட்சம் ரூபாய் நிதி ஒதுக்கப்பட்டுள்ளதாக கூறியுள்ளார்.
தஞ்சை – திருச்சி மாவட்டங்களை இணைக்கும் வகையில் ஒன்பதரை கிலோ மீட்டர் தூரத்திற்கு சாலை அமைக்கப்படும் என்றும், திண்டுக்கல் மாவட்டத்தில் சாலை விரிவாக்கம் மற்றும் கால்வாய் தடுப்பு சுவர் கட்ட 5 கோடியே 80 லட்சம் ரூபாய் ஒதுக்கப்பட்டுள்ளதாக குறிப்பிட்டுள்ளார்.
மேலும், மத்திய அரசு மேற்கொண்டு வரும் உள்கட்டமைப்பு திட்டங்களால் தமிழகம் வளர்ச்சி பெறும் என தெரிவித்துள்ளார்.
