மதுரை மாநகராட்சியில் ஒரு மாதத்தில் 25 ஆயிரத்து 500 டன் குப்பைகள் சேகரிக்கப்பட்டதாகவும், அதில் 10 சதவீதம் நெகிழி குப்பைகள் இருப்பதாகவும் ஆர்.டி.ஐயில் தகவல் வெளியாகியுள்ளது.
வைகை நதி பாதுகாப்பு குறித்த மதுரையைச் சேர்ந்த நாகராஜன் என்பவர் எழுப்பிய கேள்விகளுக்கு மாநகராட்சியின் தகவல் அறியும் உரிமைச் சட்டத்தின் கீழ் பதில் அளிக்கப்பட்டுள்ளது.
அதில், மதுரை மாநகராட்சியில் மாதத்திற்கு 25 ஆயிரத்து 500 டன் குப்பைகள் சேமிக்கப்படுவதாகவும், மதுரை மாநகராட்சியின் 5 மண்டலங்களில் மட்டும் ஒரு நாளைக்கு 850 டன் குப்பை எடுக்கப்படுவதாகவும் தெரிவிக்கப்பட்டுள்ளது.
மாநகராட்சி சேகரிக்கும் குப்பைகளில் 10 சதவீதம் நெகிழிகள் இருப்பதாகவும் கூறப்பட்டுள்ளது. வைகை ஆற்றில் குப்பை போடும் தனிநபர் மற்றும் நிறுவனங்களுக்கு 500 முதல் 5000 ரூபாய் வரை அபராதம் விதிக்கப்படுவதாகவும், வைகை ஆற்றை சுற்றிலும் எந்த ஒரு கண்காணிப்பு கேமராவும் பொருத்தப்படவில்லை எனவும் மாநகராட்சி தகவல் அளித்துள்ளது.
