தேனியில் இந்து முன்னணி சார்பில் விநாயகர் சிலைகள் ஊர்வலமாக எடுத்து செல்லப்பட்டு ஆற்றில் கரைக்கப்பட்டன.
விநாயகர் சதுர்த்தி விழாவை முன்னிட்டு தேனியில் பல்வேறு பகுதிகளில் விநாயகர் சிலைகளை வைத்து வழிபாடு நடைபெற்றது. இதனை அடுத்து விநாயகர் திருமேனிகளைக் ஆற்றில் கரைப்பதற்காக இந்து முன்னணி சார்பில் ஊர்வலம் நடைபெற்றது.
தேனியின் பல்வேறு பகுதிகளில் வைக்கப்பட்ட சிலைகள் பொம்மையகவுண்டன்பட்டி பகுதிக்கு வாகனத்தில் எடுத்துவரப்பட்டு அங்கிருந்து ஊர்வலம் தொடங்கியது.
அல்லிநகரம், பழைய பேருந்து நிலையம், பங்களாமேடு உள்ளிட்ட முக்கிய வீதிகள் வழியாக ஊர்வலம் நடைபெற்று அரண்மனை புதூரில் உள்ள முல்லைப் பெரியாற்றில் நிறைவடைந்தது.
மின்விளக்குகளால் அலங்கரிக்கப்பட்ட பிரம்மாண்ட விநாயகர் சிலைகள் பொதுமக்களை கவரும் வகையில் அமைந்திருக்க வழி நெடுகிலும் ஏராளமான பக்தர்கள் காத்திருந்து வழிபட்டனர். இந்த ஊர்வலத்தில் சுமார் 30க்கும் மேற்பட்ட விநாயகர் சிலைகள் எடுத்து வரப்பட்டு ஆற்றில் கரைக்கப்பட்டன.
