உக்ரைன் வளர்ச்சிப் பாதையில் பயணிப்பதை காண ரஷ்யா விரும்புவதாக அமெரிக்க அதிபர் டிரம்ப் தெரிவித்துள்ளார்.
அமெரிக்காவின் ஃபுளோரிடா மாகாணத்தில் உள்ள மார்-எ-லாகோ அரங்கில், அமெரிக்க அதிபர் டிரம்ப் மற்றும் உக்ரைன் அதிபர் ஜெலன்ஸ்கி இடையேயான ஆலோசனை கூட்டம் நடைபெற்றது.
முன்னதாக மார்-எ-லாகோ அரங்கிற்கு வந்த உக்ரைன் அதிபர் ஜெலன்ஸ்கியை அதிபர் டிரம்ப் கைகுலுக்கி வரவேற்றார். இந்த கூட்டத்தில் இருநாட்டு முக்கிய பிரதிநிதிகள் கலந்துகொண்ட நிலையில், ரஷ்யா – உக்ரைன் போரை முடிவுக்கு கொண்டுவருவது குறித்த பல்வேறு விவகாரங்கள் அப்போது விவாதிக்கப்பட்டன.
கூட்டத்திற்கு பின் இருநாட்டு தலைவர்களும் கூட்டாக செய்தியாளர்களை சந்தித்தனர். அப்போது பேசிய அதிபர் டிரம்ப், உக்ரைன் வளர்ச்சி பாதையில் பயணிப்பதை காண ரஷ்யா விரும்புவதாகவும், இதனை இரண்டரை மணிநேர தொலைபேசி உரையாடலின்போது அதிபர் புதின் தன்னுடன் பகிர்ந்துகொண்டதாகவும் தெரிவித்தார்.
மேலும், அமெரிக்கா – ரஷ்யா – உக்ரைன் இடையேயான முத்தரப்பு பேச்சுவார்த்தை விரைவில் நடைபெறும் என நம்பிக்கை தெரிவித்த டிரம்ப், அதிபர் புதினும் போரை நிறுத்த விரும்புவதாகவும் குறிப்பிட்டார்
