திருநீர்மலை ஏரியை சீரமைப்பதில் புதிய சர்ச்சை…தூர்வாரும் பணியில் முறைகேடா? -கேள்வி எழுப்பும் மக்கள்

சென்னை அருகே திருநீர்மலை பெரிய ஏரியில் நடைபெறும் சீரமைப்பு பணிகளின் போது, தூர்வார்தல் என்ற பெயரில் அதிகளவு மணல் அகற்றப்படுவதாக குற்றச்சாட்டு எழுந்துள்ளது. அமைச்சர் தா.மோ.அன்பரசன் தொடங்கிவைத்த இந்தத் திட்டத்தில் வெளிப்படைத்தன்மை தேவை எனவும் பொதுமக்கள் கோரிக்கை விடுத்துள்ளனர்.

பல்லாவரம் சட்டமன்றத் தொகுதிக்குட்பட்ட திருநீர்மலை பெரிய ஏரியில் நடைபெறும் சீரமைப்பு பணிகள், தற்போது பல புதிய சர்ச்சைகளை உருவாகியுள்ளன. ஏரியை ஆழப்படுத்தும் பணிகள் நடைபெற்று வரும் நிலையில், அங்கு தூர்வாருவதாகக் கூறி அளவுக்கு அதிகமாக மணல் எடுக்கப்படுகிறதா என்ற சந்தேகம் பொதுமக்களிடையே எழுந்துள்ளது. ஒருகாலத்தில் சுமார் 194 ஏக்கர் பரப்பளவில் இருந்த இந்த நீர்நிலை, தற்போது சுமார் 100 ஏக்கராகச் சுருங்கியுள்ளதாக உள்ளூர் மக்கள் வேதனை தெரிவித்துள்ளனர்.

பல ஆண்டுகளாக பாழடைந்த நிலையில் இருந்த ஏரியை சீரமைக்க, 5.15 கோடி ரூபாய் அளவிற்கு அரசால் நிதி ஒதுக்கீடு செய்யப்பட்டது. கடந்த ஆண்டு இந்த திட்டத்திற்கு அமைச்சர் தா.மோ.அன்பரசன் அடிக்கல் நாட்டிய நிலையில், அடுத்தகட்ட பணிகள் மும்முரமாக நடைபெற்று வருகின்றன. அதே நேரத்தில், ஏரிக்குள் தேங்கிய மணலை அகற்றும் பணிகள் சீரமைப்பு பணிகளை விட அதிக வேகமாக நடைபெற்று வருவதும், லாரிகளில் மணல் வெளியேற்றப்பட்டு வருவதும் பல்வேறு கேள்விகளை எழுப்புவதாக விவசாயிகள் குற்றம் சாட்டியுள்ளனர்.

சீரமைப்பு பணிகள் தாமதமாக தொடங்கியதும், முழுமையான திட்டமிடல் இல்லாமையும், ஏரியின் நீர்ப்பிடிப்பு திறனை பாதிக்கக்கூடும் என நீர்நிலை ஆய்வாளர்கள் தெரிவித்துள்ளனர். இதனால் சம்மந்தப்பட்ட பகுதிகளில் நிலத்தடி நீர்மட்டம் குறையம் அபாயம் உள்ளதாகவும் அவர்கள் அச்சம் தெரிவித்துள்ளனர்.

இந்த சூழலில், அந்த தொகுதியின் எம்.எல்.ஏ, எம்.பி போன்ற மக்கள் பிரதிநிதிகள், இத்தகைய சுரண்டலை ஏன் கவனிக்கவில்லை என்ற கேள்வியும் பொதுமக்கள் மத்தியில் எழுந்துள்ளது. அதன் காரணமாக சம்மந்தப்பட்ட பிரதிநிதிகள் சம்பவ இடத்தை நேரில் ஆய்வு செய்து தேவையான நடவடிக்கைகளை மேற்கொள்ள வேண்டும் என அவர்கள் வலியுறுத்தியுள்ளனர்.

நீர் மேலாண்மை சரியாக மேற்கொள்ளப்படாவிட்டால், வரும் கோடைக் காலத்தில் நீர்வள ஆதாரம் பாதிக்கப்படும் அபாயம் இருப்பதாக சமூக ஆர்வலர்கள் எச்சரித்துள்ளனர். இந்த சூழலில் பொதுமக்கள் நிதியில் மேற்கொள்ளப்படும் இந்தப் பணிகள் முழு வெளிப்படைத்தன்மையுடன் நடைபெற வேண்டும் என அப்பகுதி மக்கள் கோரிக்கை விடுத்துள்ளனர்.

ஏரி சீரமைப்பு என்ற பொதுநலத் திட்டம், தற்போது சுற்றுச்சூழல் பாதுகாப்பு மற்றும் கனிமவள மேலாண்மை குறித்த முக்கிய விவாதமாக மாறியுள்ள நிலையில், அதிகாரப்பூர்வ விளக்கம் மற்றும் கண்காணிப்பு அவசியம் என்ற எதிர்பார்ப்பு மக்களிடையே அதிகரித்துள்ளது.