தஞ்சாவூரைச் சேர்ந்த புலினம் ஏரோஸ்பேஸ் நிறுவனத்திடம் இருந்து 100 சிறிய ரக விமானங்களை வாங்க, கோவையைச் சேர்ந்த ஸ்கைவொர்க்ஸ் ஏவியேஷன் நிறுவனம் ஒப்பந்தம் செய்துள்ளது.
கோவை நேரு இன்ஸ்டிடியூட் ஆப் டெக்னாலஜி வளாகத்தில் தேசிய விமானம் மற்றும் விண்வெளி ஸ்டார்ட்அப் மாநாட்டு நடைபெற்றது.
இந்த மாநாட்டை IAAA மற்றும் StartupTN இணைந்து நடத்தின. இதில் 100 சிறிய ரக விமானங்களை தஞ்சாவூரை சேர்ந்த Pullinam Aerospace Technologies நிறுவனத்திடம் இருந்து கோவையை சேர்ந்த Skyworks Aviation International நிறுவனம் வாங்க ரூ.175 கோடி முதல் ரூ.200 கோடி வரையிலான ஒப்பந்தம் செய்யப்பட்டது.
திமுக ஆட்சியில் கடந்த ஆண்டு அக்டோபர் மாதம் கோவையில் தமிழ்நாடு குளோபல் ஸ்டார்ட் அப் மாநாடு நடைபெற்றது. அப்போது தஞ்சாவூரை சேர்ந்த Pullinam Aerospace நிறுவனத்தின் விமானம் காட்சிப்படுத்தப்பட்டது.
இதைத்தொடர்ந்து கடந்த ஜனவரி மாதம் கோவையை சேர்ந்த Skyworks Aviation நிறுவனம் பேச்சுவார்த்தையை தொடங்கியது. சுமார் 8 மாதங்களாக நடைபெற்ற தொழில்நுட்ப ஆய்வு மற்றும் பேச்சுவார்த்தைக்கு பிறகு தற்போது ஒப்பந்தம் கையெழுத்தாகி உள்ளது.
தஞ்சாவூர் மாவட்டம் செங்கிப்பட்டி கிராமத்தில் விமான தயாரிப்பு தொழிற்சாலை அமைக்க திட்டமிட்டுள்ளது. வர்த்தக பயன்பாட்டுக்கான விமானத்தை ரூ.1½ கோடிக்கும், ராணுவ பயன்பாட்டுக்கான விமானத்தை ரூ.1 கோடிக்கும் விற்பனை செய்ய திட்டமிட்டுள்ளது.
விமானம் பெட்ரோல் என்ஜின் மூலமும், மின்சாரம் மூலமும் இயங்கும் வகையில் தயாரிக்கப்பட்டு வருகிறது. இரண்டு பேர் மட்டுமே பயணிக்க கூடிய வகையில் உள்நாட்டிலேயே விமானங்கள் தயாரிக்கபட இருப்பது தமிழக விமானத் தொழில் துறைக்கு புதிய தொடக்கமாக அமைகின்றது.
