அரசு பள்ளிகளில் 6 முதல் 8ஆம் வகுப்பு மாணவர்களும் பயன்பெறும் வகையில் காமராஜர் காலை உணவுத் திட்டம் விரிவாக்கத்தை முதலமைச்சர் ஜோசப் விஜய் சென்னையில் இன்று தொடங்கி வைக்கிறார்.
தமிழகத்தில் உள்ள அரசுப் பள்ளிகளில் 1 முதல் 5ஆம் வகுப்பு வரை பயிலும் குழந்தைகளுக்கு காலை உணவு வழங்கும் நோக்கத்தில் முதல்வரின் காலை உணவுத் திட்டம் தொடங்கப்பட்டது. பின்னர், அரசு உதவிபெறும் பள்ளிகளுக்கும் இத்திட்டம் விரிவாக்கம் செய்யப்பட்டது. இத்திட்டத்தின்கீழ் மாநிலம் முழுவதும் உள்ள 37,447 அரசு, அரசு உதவிபெறும் பள்ளிகளில் படிக்கும் 19 லட்சம் குழந்தைகளுக்கு காலை உணவு வழங்கப்பட்டு வருகிறது.
தவெக ஆட்சிக்கு வந்த பிறகு, காலை உணவுத் திட்டத்துக்கு காமராஜர் பெயர் சூட்டப்பட்டு 6 முதல் 8ஆம் வகுப்புகளுக்கும் விரிவாக்கம் செய்யப்பட்டுள்ளது. இந்நிலையில், காமராஜர் காலை உணவுத் திட்டம் விரிவாக்கத் தொடக்க விழா சென்னை திருவான்மியூரில் உள்ள அரசு நடுநிலைப் பள்ளியில் இன்று காலை நடைபெறுகிறது.
இத்திட்டத்தை முதல்வர் விஜய் தொடங்கி வைத்து குழந்தைகளுடன் உணவருந்துகிறார். இடைத்தேர்தல் நடைபெற உள்ள மதுராந்தகம், தாராபுரம் தொகுதிகள் தவிர்த்து மற்ற அனைத்து மாவட்டங்களிலும் இத்திட்டம் இன்று முதல் அமலுக்கு வருகிறது.
