திருச்சி மாநகராட்சி மாமன்ற கூட்டத்தில், மாநகராட்சி ஆணையரை கண்டித்து திமுக கவுன்சிலர்கள் கருப்பு உடை அணிந்து பங்கேற்றதால் பரபரப்பு ஏற்பட்டது.
திருச்சி மாநகராட்சியின் மாமன்றக் கூட்டம் மேயர் அன்பழகன் தலைமையில் நடைபெற்றது. இதில் துணை மேயர், மாநகராட்சி ஆணையர் பொன்மணி மற்றும் 65 வார்டு கவுன்சிலர்கள் பங்கேற்றனர். அப்போது, மாநகராட்சி ஆணையரை கண்டித்து திமுக கவுன்சிலர்கள் கருப்பு உடை அணிந்து கூட்டத்தில் பங்கேற்றனர். இதுகுறித்து பேசிய 57-வது வார்டு கவுன்சிலர் முத்துச்செல்வம், கடந்த 5 மாதங்களாக 65 வார்டுகளிலும் பணிகள் மேற்கொள்ள முடியாத நிலை உள்ளதாகவும், ஏற்கனவே ஒதுக்கப்பட்ட நிதியும் ரத்து செய்யப்பட்டுள்ளதாகவும் குற்றம்சாட்டினார். மேலும், வார்டுகளில் ஆணையர் ஆய்வு மேற்கொள்ளும்போது கவுன்சிலர்களுக்கு தகவல் தெரிவிப்பதில்லை என்றும், அமைச்சருடன் மாநகராட்சி அலுவலகத்தில் நடைபெற்ற ஆலோசனைக் கூட்டம் குறித்தும் மேயர் மற்றும் கவுன்சிலர்களுக்கு தகவல் தெரிவிக்கப்படவில்லை என்றும் கூறினார். இதனை கண்டித்து கருப்பு உடை அணிந்து எதிர்ப்பு தெரிவித்ததாக திமுக கவுன்சிலர்கள் தெரிவித்தனர்.
