மெட்டா நிறுவனத்தின் ‘வாட்ஸ்அப்’ ஆதிக்கத்திற்கு போட்டியாக, தமிழகத்தைச் சேர்ந்த உலகளாவிய சாப்ட்வேர் நிறுவனமான ‘ஜோஹோ’, தனது ‘அரட்டை பிசினஸ்’ செயலியை, அதிகாரப்பூர்வமாக அறிமுகம் செய்துள்ளது.
இந்தியாவில் உருவான மெசேஜிங் செயலியான ‘அரட்டை’, ஏற்கனவே மக்களிடையே பெரும் வரவேற்பைப் பெற்ற நிலையில், தற்போது வர்த்தக நிறுவனங்களைக் குறிவைத்து ‘அரட்டை பிசினஸ்’ செயலி அறிமுகப்படுத்தப்பட்டு உள்ளது.
இதுகுறித்து ஸ்ரீதர் வேம்பு வெளியிட்டுள்ள பதிவில், தொழில் நிறுவனங்கள் தங்களது வாடிக்கையாளர்களுடன் சுலபமாகத் தொடர்பு கொள்ளும் வகையில் ‘அரட்டை பிசினஸ்’ செயலி பயன்பாட்டுக்கு வந்துள்ளதாக குறிப்பிட்டுள்ளார்.
மேலும், பல்வேறு சாப்ட்வேர் அமைப்புகளை ஒருங்கிணைக்கும் ‘அரட்டை பிசினஸ் பிளாட்பார்ம்’ தளமானது, ரயில்வே உள்ளிட்ட அனைத்து அரசு மற்றும் பொதுநல சேவைகளுக்கு முற்றிலும் இலவசமாக வழங்கப்படும் என்றும் தெரிவித்துள்ளார்.
இந்தியாவிலேயே வடிவமைக்கப்பட்ட இந்த செயலி, முழுமையான பாதுகாப்பு மற்றும் டேட்டா பாதுகாப்பு அம்சங்களுடன் வெளிவந்துள்ளது குறிப்பிடத்தக்கது.
