இலங்கை சிறையில் உள்ள தமிழக மீனவர்களை விடுவிப்பது தொடர்பாக தூதரக ரீதியில் நடவடிக்கை மேற்கொள்ளப்படுவதாக உயர்நீதிமன்ற மதுரை அமர்வில் மத்திய அரசு தெரிவித்துள்ளது.
ராமநாதபுரத்தை சேர்ந்த நாம் தமிழர் கட்சியின் மீனவர் பாசறை நிர்வாகி தீரன் திருமுருகன் தாக்கல் செய்த மனு நீதிபதிகள் வேல்முருகன், ராமகிருஷ்ணன் அமர்வில் விசாரணைக்கு வந்தது. அப்போது மத்திய அரசு தாக்கல் செய்த பதில் மனுவில், இந்திய மீனவர்கள் எல்லை தாண்டி மீன்பிடிப்பது, இலங்கை கடற்பரப்பில் மீன்பிடிப்பது உள்ளிட்ட காரணங்களுக்காக கைது செய்யப்படுவதாகத் தெரிவிக்கப்பட்டது.
இந்தக் குற்றச்சாட்டுகள் அடிப்படையில் கைது செய்யப்பட்ட தமிழக மீனவர்கள் உட்பட 39 இந்தியர்கள் இலங்கை சிறைகளில் உள்ளதாகத் தெரிவிக்கப்பட்டது.
தமிழக மீனவர்கள் மற்றும் மீன்பிடிப் படகுகளை விரைவாக விடுவித்து தாயகம் திரும்பச் செய்வது உள்ளிட்ட நடவடிக்கைகளை தூதரக ரீதியில் மேற்கொள்ளப்பட்டு வருவதாக தெரிவிக்கப்பட்டது.
இந்தியா – இலங்கை ஒப்பந்தப்படி தூதரக அதிகாரிகள் பேச்சுவார்த்தை நடத்தி, மீனவர்களின் தண்டனை குறைக்கப்பட்டு அவர்கள் விரைவில் தாயகம் திரும்ப நடவடிக்கை எடுக்கப்படும் என்றும் தெரிவிக்கப்பட்டது.
இதைப் பதிவு செய்து கொண்ட நீதிபதிகள், தமிழக மீனவர்கள் எல்லை தாண்டி செல்லக் கூடாது என்றும், கவனமாக இருக்க வேண்டும் என்று கூறி மனுவை முடித்து வைத்து உத்தரவிட்டனர்.
