தமிழகம் முழுவதும் நீடிக்கும் தொடர் மின்தடை அதிகார மையமான தலைமைச் செயலகம் வரை பாதித்துள்ளதாக பாமக தலைவர் அன்புமணி தெரிவித்துள்ளார்.
இது குறித்து அவர் வெளியிட்டுள்ள பதிவில், தலைமைச் செயலகத்தின் முதல் தளத்தில் ஏற்பட்ட மின் தடை காரணமாக அமைச்சர்கள் அலுவலக அறைகள் இருளில் மூழ்கியதாகவும், தமிழ்நாடு முழுவதும் பாதிப்பை ஏற்படுத்தியுள்ள மின்தடை தமிழக அரசின் அதிகார பீடமான தலைமைச் செயலகத்திலும் பாதிப்பை ஏற்படுத்தியிருப்பது கவலையளிப்பதாகவும் கூறியுள்ளார்.
தமிழ்நாட்டில் அறிவிக்கப்படாத மின்வெட்டு கடந்த ஒரு மாதத்திற்கும் நீடித்து வருவதாகவும், மின்தடை பாதிக்கப்படாத பகுதிகளே இல்லை எனும் அளவுக்கு தமிழகத்தின் அனைத்து ஊர்களிலும் மின்வெட்டு நடைமுறைப்படுத்தப்பட்டு வருவதாகவும் குற்றஞ்சாட்டியுள்ளார்.
அமைச்சர்கள் பங்கேற்ற நிகழ்ச்சிகளில் ஏற்பட்ட மின் தடை இப்போது தலைமை செயலகம் வரை சென்றிருப்பது நிலைமை மோசமடைந்திருப்பதையே காட்டுவதாகவும்,மின்வெட்டு நிலைமையை தமிழக அரசு உடனடியாக சரி செய்ய வேண்டும் எனவும் வலியுறுத்தியுள்ளார்.
தமிழ்நாட்டின் மின் தேவைக்கும், மின்சாரம் கிடைப்பதற்கும் பெரும் இடைவெளி காணப்படுவது தான் மின்தடைக்கு காரணம் எனவும்,4500 மெகாவாட் மின்சாரம் கொள்முதல் செய்யப்படுவதாக அரசு தெரிவித்த பிறகும் மின் வெட்டும், மின் தடையும் தொடர்வது ஏன்? எனவும் கேள்வி எழுப்பியுள்ளார்.
