மணிப்பூர் சம்பவம் தொடர்பான வழக்கை மத்திய புலனாய்வுத் துறைக்கு மாற்றவும், மேலும் இது தொடர்பான விசாரணையை மணிப்பூர் அல்லாத வேறு மாநிலத்துக்கு மாற்றவும் பரிந்துரைத்து மத்திய உள்துறை அமைச்சகம் உச்ச நீதிமன்றத்தில் ஒரு பிரமாணப் பத்திரம் தாக்கல் செய்திருக்கிறது.
நாடாளுமன்ற மழைக் கால கூட்டத் தொடர் தொடங்கும் முன்பாக பேசிய பிரதமர் மோடி,
“மணிப்பூரில் நடந்துள்ள சம்பவம் நாகரிக சமூகத்துக்கான அவமானம். இதற்காக நாடு வெட்கப்படுகிறது. பெண்களுக்கு எதிரான குற்றங்கள் மீது நடவடிக்கை எடுக்க கடுமையான சட்டங்களை இயற்றும்படி நான் அனைத்து மாநில முதல்வர்களுக்கும் வேண்டுகோள் விடுக்கிறேன்.
இந்தச் சம்பவம் ராஜஸ்தான், சத்தீஸ்கர், மணிப்பூர் எங்கு வேண்டுமானாலும் நடந்திருக்கலாம், குற்றவாளிகள் நாட்டின் எந்தப் பகுதியில் இருந்தாலும் தப்பக் கூடாது. நான் நாட்டுக்கு உறுதியளிக்கிறேன். சட்டம் அதன் முழு பலத்துடன் தனது கடமையைச் செய்யும். மணிப்பூரின் மகள்களுக்கு நடந்தது மன்னிக்க முடியாதது” என்று தெரிவித்தார்.
நாடாளுமன்ற மழைக்கால கூட்டத்தொடர் கடந்த ஜூலை 20 ஆம் தேதி தொடங்கியது. மணிப்பூர் விவகாரத்தில் பிரதமர் மோடி விளக்கம் அளிக்க வேண்டும் என்று முதல் நாளிலிருந்தே எதிர்க்கட்சிகள் தொடர் அமளியில் ஈடுபட்டு நாடாளுமன்றத்தின் இரு அவைகளையும் நடத்த விடாமல் முடக்கின. இதனைத் தொடர்ந்து நாடாளுமன்றத்தில் கூச்சல் குழப்பம் ஏற்பட்டது. எதிர்க்கட்சியினர் கொடுத்த நம்பிக்கையில்லா தீர்மானம் அடுத்த வாரம் விவாதத்துக்கு ஏற்றுக் கொள்ளப்படும் எனத் தகவல்கள் வெளியாகியுள்ளன.
இந்தச் சூழலில் மணிப்பூர் சம்பவம் தொடர்பான வழக்கை மத்திய புலனாய்வுத் துறைக்கு மாற்றவும், மேலும் இது தொடர்பான விசாரணையை மணிப்பூர் அல்லாத வேறு மாநிலத்துக்கு மாற்றவும் பரிந்துரைத்து மத்திய உள்துறை அமைச்சகம் உச்ச நீதிமன்றத்தில் ஒரு பிரமாணப் பத்திரம் தாக்கல் செய்திருப்பதாக ஏஎன்ஐ செய்தி நிறுவனம் தெரிவித்துள்ளது.
