பிரதமர் மோடி ‘மேக் இன் இந்தியா’ திட்டத்தை அறிமுகம் செய்த 18 மாதங்களுக்கு பின்னர் இந்த வந்தே பாரத் இரயில் திட்டம் ரூ.100 கோடியில் உருவாக்கப்பட்டது. தற்போது இயக்கப்பட்டு வரும் வந்தே பாரத் ரயில் 16 பெட்டிகளை கொண்டதாகவும், 14 சேர்கார் பெட்டிகளையும், 2 சொகுசு இருக்கைகள் கொண்ட பெட்டியாகவும் உருவாக்கப்பட்டு உள்ளது.
முதல் வந்தே பாரத் இரயிலின் தொடக்க ஓட்டத்தை 2019 ஜனவரி 27 அன்று மோடி கொடியசைத்துத் தொடங்கி வைத்தார். தற்போது இந்தியாவில் உள்ள முக்கிய மாநிலங்களில் வந்தே பாரத் விரைவு இரயில் இயங்கி வருகிறது. வந்தே பாரத் விரைவு வண்டி இரயில்கள் தயாரிக்க ரூபாய் 1343.72 கோடி பயன்படுத்தப்பட்டுள்ளது என இந்திய இரயில்வே அமைச்சர் அஸ்வினி வைஷ்ணவ், மக்களவையில் எழுத்துப்பூர்வமாக தெரிவித்தார்.
ஜூலை 28, 2023 நிலவரப்படி, இரயில்வேயில் 50 வந்தே பாரத் இரயில் சேவைகள் இயக்கப்படுகின்றன. அதிவேகம், மேம்பட்ட பாதுகாப்பு தரம் மற்றும் உலகத் தரம் வாய்ந்த சேவை ஆகியவை இந்த இரயில்களின் முக்கிய அடையாளங்களாகும். பயணிகளுக்கு சிறந்த பயண அனுபவத்தை வழங்கும் நோக்கில், பின்வரும் மேம்பட்ட பாதுகாப்பு அம்சங்கள் மற்றும் வசதிகளைக் கொண்ட நவீன பெட்டிகளுடன் வந்தே பாரத் இரயில்கள் அறிமுகப்படுத்தப்பட்டுள்ளன. இந்த இரயிலில் கவாச் பொருத்தப்பட்டுள்ளது, 160 கிலோ மீட்டர் வரை வேகம் மற்றும் அரை அதிவேக செயல்பாடு, தானியங்கி பிளக் கதவுகள், வசதியான இருக்கைகள், சிறந்த பயண அனுபவம், ஒவ்வொரு இருக்கைக்கும் மொபைல் சார்ஜிங் வசதி, ஹாட் கேஸ், பாட்டில் கூலர், டீப் ஃப்ரீசர் மற்றும் ஹாட் வாட்டர் பாய்லர் வசதிகளுடன் கூடிய மினி பேன்ட்ரி, சிறந்த விளக்கு வசதிகள், மாற்றுத்திறனாளி பயணிகளுக்கு சிறப்பு கழிவறை, ஒவ்வொரு பெட்டியிலும் அவசரகால ஜன்னல் மற்றும் தீ பாதுக்காப்பு நடைமுறைகள், அனைத்து ரயில் பெட்டிகளிலும் சிசிடிவி, அனைத்து இரயில் பெட்டிகளிலும் அவசரகால அலாரம், சிறந்த தீ பாதுகாப்பு நடைமுறைகள், ரிமோட் கண்காணிப்புடன் கூடிய பெட்டி கண்காணிப்பு முறை (சி.சி.எம்.எஸ்) என வந்தே பாரத் இரயில்கள் தயாரிக்க ரூ.1343.72 கோடி நிதி பயன்படுத்தப்பட்டுள்ளது என தெரிவிக்கப்பட்டுள்ளது.
