பள்ளத்தைப் பார்த்த ரோவர்: பாதையை மாற்றி பயணம்!

நிலவில் வெற்றிகரமாகத் தரையிறங்கி, ஆராய்ச்சியை மேற்கொண்டிருக்கும் சந்திரயான்-3 விண்கலத்தின் ரோவர், பள்ளத்தைப் பார்த்ததும் தனது பாதையை மாற்றிக் கொண்டு பாதுகாப்பாக பயணிப்பதாக இஸ்ரோ தெரிவித்திருக்கிறது.

2019-ம் ஆண்டு இந்தியாவில் விண்ணில் செலுத்தப்பட்ட சந்திரயான்-2 விண்கலம், கட்டுப்பாட்டை இழந்ததைத் தொடர்ந்து, 4 ஆண்டுகள் கடும் முயற்சிக்குப் பிறகு, சந்திரயான்-3 விண்கலத்தை இஸ்ரோ விஞ்ஞானிகள் உருவாக்கினர். கடந்த மாதம் 14-ம் தேதி விண்ணில் செலுத்தப்பட்ட இந்த விண்கலம் 40 நாட்கள் பயணத்திற்குப் பிறகு, கடந்த 23-ம் தேதி மாலை 6.04 மணியளவில் வெற்றிகரமாக நிலவில் தரையிறக்கப்பட்டது.

இதன் பிறகு, லேண்டரில் இருந்து ரோவர் வெளியேறி நிலவை ஆராய்ச்சி செய்து வருகிறது. பெங்களூரு பீனியாவிலுள்ள இஸ்ரோ கட்டுப்பாட்டு மையத்தில் இருந்து, ரோவரின் செயல்பாடுகளை விஞ்ஞானிகள் கண்காணித்து வருகின்றனர். நிலவின் தென்துருவத்தில் வெப்பநிலைப் எப்படி உள்ளது என்பதை ரோவர் நேற்று ஆய்வு செய்து வெளியிட்டது.

Chandrayaan-3 Mission:

On August 27, 2023, the Rover came across a 4-meter diameter crater positioned 3 meters ahead of its location.
The Rover was commanded to retrace the path.

It's now safely heading on a new path.#Chandrayaan_3#Ch3 pic.twitter.com/QfOmqDYvSF

— ISRO (@isro) August 28, 2023

இந்த நிலையில்தான், ரோவர் தனக்கு முன்னாள் பள்ளம் இருப்பதை உணர்ந்து பாதையை மாற்றி இருப்பதாக இஸ்ரோ விஞ்ஞானிகள் தெரிவித்திருக்கிறார்கள். இதுகுறித்து இஸ்ரோ எக்ஸ் பக்கத்தில் விஞ்ஞானிகள் கூறுகையில், “ரோவரால் 5 மீட்டர் தொலைவில் உள்ளவற்றை உணர முடியும். இந்த சூழலில், 3 மீட்டர் தொலுவிலுள்ள பள்ளத்தை உணர்ந்தது.

அதேசமயம், மேடான பகுதியை கடக்கும் வகையில் ரோவரில் தொழில்நுட்ப வசதிகள் செய்யப்பட்டுள்ளன. இந்த சூழலில், தனது பாதையில் 4 மீட்டர் பள்ளம் இருப்பதை ரோவர் உணர்ந்தது. இதையடுத்து, பாதையை மாற்றிய ரோவர், தற்போது புதிய பாதையில் பாதுகாப்பாக பயணித்து வருகிறது” என்று குறிப்பிட்டிருக்கிறார்கள். லேண்டரில் இருந்து ரோவரால் 500 மீட்டர் பயணிக்க முடியும். தற்போது 8 முதல் 10 மீட்டர் தொலைவில் மட்டுமே உள்ளது என்பது குறிப்பிடத்தக்கது.