ஆவணி மாத சோமவார வளர்பிறை பிரதோஷ தினத்தையொட்டி, திருவண்ணாமலையில் உள்ள அருள்மிகு அண்ணாமலையார் திருக்கோவிலில், பெரிய நந்தியம் பெருமானுக்கு சிறப்பு அபிஷேக, ஆராதனை நடைபெற்றது.
பஞ்ச பூத ஸ்தலங்களில் அக்னி ஸ்தலமாகவும், நினைத்தாலே முக்தி தரும் ஸ்தலமாகவும் திகழ்ந்து வருவது திருவண்ணாமலையில் உள்ள அருள்மிகு அண்ணாமலையார் திருக்கோவில்.
இந்த திருக்கோவிலில், ஆவணி மாத சோமவார வளர்பிறை பிரதோஷத்தையொட்டி, நந்தியம் பெருமானுக்குச் சிறப்பு அபிஷேகம் நடைபெற்றது.
இதில், மஞ்சள் தூள், பஞ்சாமிர்தம், தயிர், தேன், பன்னீர், இளநீர், சந்தனம், விபூதி, அரிசி மாவு மற்றும் ஆயிரம் லிட்டர் பால் ஆகியவற்றைக் கொண்டு சிறப்பு அபிஷேகம் செய்யப்பட்டது.
இதனைத்தொடர்ந்து, நந்தியம் பெருமானுக்கு வில்வ இலை, சாமந்திப்பூ, மல்லி, கனகாம்பரம் மற்றும் அருகம்புல் ஆகிய பூக்களால் மாலை அணிவித்துச் சிறப்பு அலங்காரம் செய்யப்பட்டு, சங்கொலி முழங்க பஞ்சமுகத் தீபாராதனை நடைபெற்றது.
பிரதோஷம் அன்று நந்தியும் பெருமானை வழிப்பட்டால் திருமணம் ஆகாதவர்களுக்கு திருமண பாக்கியமும், குழந்தைப்பேறு இல்லாதவர்களுக்கு குழந்தை பாக்கியமும் கிட்டும், சகல ஐஸ்வர்யங்கள் கிட்டும், தோஷங்கள் விலகும், நினைத்த காரியங்கள் அனைத்தும் நிறைவேறும் என்பது ஐதீகம்.
இதனால், அருள்மிகு அண்ணாமலையார் திருக்கோயிலில் நடைபெற்ற பிரதோஷ வழிபாட்டில், திருவண்ணாமலை மற்றும் தமிழகத்தின் பல்வேறு பகுதிகளில் இருந்து திரளான பக்தர்கள் கலந்து கொண்டு சுவாமியையும், நந்தியம் பெருமானையும் மனம் உருக தரிசனம் செய்தனர்.
இதேபோல, தமிழகத்தின் பல்வேறு பகுதிகளில் உள்ள சிவாலயங்களில் நந்தியம் பெருமானுக்கு பிரதோஷ வழிபாடு மிகச் சிறப்பாக நடைபெற்றது.
