மேட்டூர் அணையின் நீர்மட்டம் குறைந்தது!

தமிழகத்தின் காவிரி டெல்டா மாவட்ட வி‌வசாயிகள் பெரிதும் நம்பியுள்ள 120 அடி உயரமுள்ள மேட்டூர் அணையில் தற்போதைய நீர்மட்டம் 51 அடியாகச் குறைந்துள்ளது.

குறுவை, சம்பா சாகுபடி பாசனத்திற்காக மேட்டூர் அணையிலிருந்து கடந்த ஜூன் 12-ந் தேதி தண்ணீர் திறக்கப்பட்டது. தொடர்ந்து, பாசனத் தேவைக்கு ஏற்ப அதிகரித்தும், குறைத்தும் தண்ணீர் திறக்கப்பட்டு வருகிறது. இதன் மூலம் சேலம், கரூர், திருச்சி, தஞ்சாவூர், திருவாரூர், நாகை, மயிலாடுதுறை, கடலூர், புதுக்கோட்டை மாவட்டங்களில் உள்ள 50 ஆயிரத்திற்கும் மேற்பட்ட நிலம் பாசன வசதி பெறுகிறது.

இந்நிலையில், காவிரி நீர்ப்பிடிப்புப் பகுதிகளில் பருவ மழை பொய்த்துப் போனதால் அணைக்கு வரும் நீரின் அளவு குறைந்து காணப்பட்டது. இதனால் மேட்டூர் அணையின் நீர்மட்டம் வேகமாகக் குறைந்து வருகிறது.

அதன்படி, இன்று காலை 8 மணி நிலவரப்படி மேட்டூர் அணையின் நீர்மட்டம் 51 அடியாக இருந்தது. அணைக்கு வரும் நீரின் அளவு வினாடிக்கு 792 கன அடியாக உள்ளது. அணையிலிருந்து தொடர்ந்து, வினாடிக்கு 10 ஆயிரம் கன அடி வீதம் தண்ணீர் வெளியேற்றப்பட்டு வருகிறது. அணையில் தற்போது, 18.44 டி.எம்.சி. தண்ணீர் இருப்பு உள்ளது. காவிரி நீர்பிடிப்பு பகுதிகளில் மழை விட்டுவிட்டுப் பெய்து வருவதால், அணைக்கு வரும் நீரின் அளவு அதிகரித்தும், குறைந்தும் காணப்படுகிறது.

மேலும், அணைக்கு வரும் நீரின் அளவை விடப் பாசனத்திற்காகத் திறக்கப்படும் நீரின் அளவு அதிகமாக உள்ளதால், அணையின் நீர் மட்டம் தொடர்ந்து குறைந்து வருகிறது.