ஆசியக் கோப்பை கிரிக்கெட் தொடரில் பாகிஸ்தான் அணி தங்களுடைய முதல் ஆட்டத்தில் நேபாளத்தை 238 ரன்கள் வித்தியாசத்தில் வீழ்த்தி வெற்றிப் பெற்றுள்ளது. இந்த நிலையில் பாகிஸ்தான் அணி வரும் சனிக்கிழமை இந்தியாவை எதிர்கொள்ள உள்ளது.
இதனைத் தொடர்ந்து நேற்று செய்தியாளர்களைச் சந்தித்த பாகிஸ்தான் அணியின் கேப்டன் பாபர் அசாம், “இந்தப் போட்டியின் மூலம் எங்களுடைய அணி வீரர்களின் நம்பிக்கை அதிகரித்துள்ளது. நாங்கள் விளையாடும் அனைத்து போட்டிகளிலும் 100% எங்களுடைய பங்களிப்பைக் கொடுப்போம். இந்தியாவுக்கு எதிராகவும் இதே போல் செயல்படுவோம் என நம்புகிறேன். இந்தியாவின் சவாலுக்குத் தயாராக இருக்கிறோம் என்று கூறினார்.
மேலும் பேசிய அவர், “நேபாளத்துக்கு எதிராக முதலில் எங்களுடைய பேட்ஸ்மேன்கள் தடுமாறினார்கள். அதற்குக் காரணம் பந்து பேட்டிற்கு சரியாக வரவில்லை. எனவே நானும் ரிஸ்வானும் இணைந்து பார்ட்னர்ஷிப் அமைக்க முற்பட்டோம். சில சமயம் ரிஸ்வான் எனக்கு நம்பிக்கை கொடுப்பார். சிலமுறை நான் அவருக்கு நம்பிக்கை அளிப்பேன். இந்தப் போட்டியில் இப்திகார் சிறப்பாக விளையாடி ரன்களைச் சேர்த்துள்ளார். நான் அவரிடம் உங்களுடைய இயல்பான ஆட்டத்தை வெளிப்படுத்துங்கள் என்று கூறினேன். அவர் இரண்டு மூன்று பவுண்டரிகள் அடித்த பிறகு களத்தில் இயல்பாக இருந்தார். எங்களுடைய சுழற் பந்துவீச்சாளர்களும் வேகப்பந்துவீச்சாளர்களும் நன்றாக பந்து வீசினார்கள்” என்று பாபர் அசாம் கூறினார்.
ஆசியக் கோப்பையில் எந்தப் பயிற்சி ஆட்டமும் இல்லாமல் இந்திய அணி தங்களுடைய முதல் போட்டியிலே பாகிஸ்தானை எதிர்கொள்கிறது. ஆனால் பாகிஸ்தான் அணி நேபாளத்தை எதிர்கொண்டு பேட்டிங் பந்துவீச்சு என இரண்டிலும் நல்ல பயிற்சியை எடுத்துவிட்டது.
இந்நிலையில், இந்திய வீரர்கள் தங்களது சிறப்பான ஆட்டத்தை காண்பித்து வெற்றி வாகை சூடுவார்கள் என்பதே இந்திய இரசிகர்களின் எதிர்பார்ப்பாக உள்ளது.
