சூரியனை ஆய்வு செய்வதற்காக அனுப்பப்பட்ட ஆதித்யா எல்-1 விண்கலம், வெற்றிகரமாக 4-வது முறை புவி சுற்று வட்டப் பாதையின் உயரம் அதிகரிக்கப்பட்டிருப்பதாக இந்திய விண்வெளி ஆராய்ச்சி மையமான இஸ்ரோ தெரிவித்திருக்கிறது.
நிலவை ஆய்வு செய்வதற்காக அனுப்பப்பட்ட சந்திரயான்-3 விண்கலம், கடந்த ஆகஸ்ட் மாதம் 23-ம் தேதி மாலை 6.04 மணியளவில் வெற்றிகரமாகத் தரையிறக்கப்பட்டது. இதைத் தொடர்ந்து, சூட்டோடு சூடாக, சூரியனை ஆய்வு செய்வதற்காக உருவாக்கப்பட்டிருந்த ஆதித்யா எல்-1 விண்கலத்தை செலுத்த இஸ்ரோ முடிவு செய்தது.
அதன்படி, ஆந்திர மாநிலம் ஸ்ரீஹரிகோட்டாவில் இருந்து கடந்த 2-ம் தேதி காலை 11.50 மணியளவில் பி.எஸ்.எல்.வி. சி-57 ராக்கெட் மூலம், ஆதித்யா எல்-1 விண்கலம் சூரியனை நோக்கி வெற்றிகரமாக செலுத்தப்பட்டது. இது புவி சுற்று வட்டப் பாதையில் வெற்றிகரமாக நிலைநிறுத்தப்பட்ட நிலையில், அதன் சுற்று வட்டப் பாதையின் உயரம் படிப்படியாக அதிகரிக்கப்பட்டு வருகிறது.
இந்த விண்கலம் 4 மாதங்கள் பயணித்து ஜனவரி மாதம் 4-ம் தேதி, அதன் இலக்கான லாக்ரேஞ்ச் பாயின்ட் எல்-1 என்ற இடத்தில் நிலைநிறுத்தப்படும் என்று இஸ்ரோ தெரிவித்துள்ளது. இந்த சூழலில், ஆதித்யா எல்-1 விண்கலத்தின் சுற்று வட்டப் பாதை 4-வது முறையாக மீண்டும் வெற்றிகரமாக உயர்த்தப்பட்டிருக்கிறது. செப்டம்பர் 19-ம் தேதி அடுத்த சுற்று வட்டப் பாதைக்கு மாற்றம் செய்யப்படும் என்று இஸ்ரோ தெரிவித்திருக்கிறது.
