கோவை மாவட்டம் மேட்டுப்பாளையம் நகராட்சியின் அவசரக் கூட்டத்தில், எதிர்க்கட்சி பெண் கவுன்சிலர் மீது, திமுக கவுன்சிலர் நாற்காலி வீசிய சம்பவம் பெரும் பரபரப்பை ஏற்படுத்தியுள்ளது.
மேட்டுப்பாளையம் நகராட்சியின் அவசரக் கூட்டம் நகராட்சி தலைவர் மெஹரீபா பர்வீன் தலைமையில் கூட்ட அரங்கில் நடைபெற்றது.
மேட்டுப்பாளையம் நகராட்சி பகுதியில் கடந்த ஒரு மாத காலமாகத் தேங்கியுள்ள குப்பைகளை முறையாக அப்புறப்படுத்தாமல் உள்ளனர். இதனால், சுகாதார சீர்கேடு ஏற்பட்டுள்ளதாக கவுன்சிலர்கள் சிலர் புகார் தெரிவித்து, வாக்கு வாதத்தில் ஈடுபட்டனர்.
இதற்குப் பதில் அளிக்க வேண்டிய நகராட்சி ஆணையர் மற்றும் பொறியாளர் ஆகியோர் கூட்டத்தில் கலந்து கொள்ளவில்லை. இதனால், கூட்டத்தை நடத்தக் கூடாது அதிகாரிகள் வந்த பின்னரே கூட்டத்தை நடத்த வேண்டும் என கவுன்சிலர்கள் அமளியில் ஈடுபட்டனர்.
ஆனால், நகராட்சி தலைவர் கூட்டத்தை நடத்த வேண்டும் என திமுக கவுன்சிலர்கள் கூறியதால் இரு தரப்பு கவுன்சிலர்கள் இடையே கடும் வாக்கு வாதம் ஏற்பட்டு, பின்னர் ஒரு கட்டத்தில் அது மோதலாக உருவெடுத்தது.
எதிர்க்கட்சி கவுன்சிலர்கள் பேசியதற்கு எதிர்ப்பு தெரிவித்து திமுக 17 -வார்டு கவுன்சிலர் ரவிக்குமார் திடீரென பெண் கவுன்சிலர் விஜயலட்சுமி மீது நாற்காலியைத் தூக்கி வீசினார்.
இதனால் ஆவேசம் அடைந்த எதிர்க்கட்சி கவுன்சிலர்களும், திமுக உறுப்பினர்களுக்கும் இடையே கடும் மோதல் ஏற்பட்டது. நகராட்சி தலைவர் இரு தரப்பினரையும் சமாதானம் செய்ய முயன்றும் முடியாததால், மன்ற கூட்டத்தில் வைக்கப்பட்ட 11 தீர்மானம் ஆல் பாஸ் எனக் கூறிவிட்டு அரங்கைவிட்டு வெளியேறினார்.
இதனால் கோபமடைந்த எதிர்க்கட்சி கவுன்சிலர்கள் 9 பேரும், திமுக கவுன்சிலர்கள் குண்டர்கள் போல நடந்துகொள்வதாகவும், பெண் கவுன்சிலர் மீது நாற்காலி வீசிய ரவிக்குமார் மீது நடவடிக்கை எடுக்க வேண்டும் என கூறி மன்ற கூட்டத்தில் அமர்ந்து தொடர் போராட்டத்தில் தற்போது ஈடுபட்டு வருகின்றனர்.
