உத்தரப் பிரதேசத்தில் டிரக் மீது கார் மோதி தீப்பிடித்ததில், காரில் பயணித்த குழந்தை உள்பட 8 பேர் தீயில் கருகி உயிரிழந்தனர்.
உத்தரப் பிரதேச மாநிலம் பரெய்லி பகுதியிலுள்ள நைனிடால் நெடுஞ்சாலையில் நேற்று இரவு கார் ஒன்று வேகமாக சென்று கொண்டிருந்தது. அந்தக் கார் திடீரென டிரைவரின் கட்டுப்பாட்டை இழந்து, எதிர்திசையில் வந்த டிரக் மீது மோதியது.
இதில், அந்தக் கார் சிறிது தூரம் இழுத்துச் செல்லப்பட்டது. இதனால், காரினுள் இருந்தவர்கள் வெளியே வரமுடியாமல் சிக்கிக் கொண்டனர். அப்போது, திடீரென அக்கார் தீப்பிடித்து எரிந்தது. இந்த விபத்தில் காரில் பயணித்த குழந்தை உள்பட 8 பேர் தீயில் கருகி பலியாகினர்.
தகவலறிந்து சம்பவ இடத்திற்கு வந்த போலீஸார் உயிரிழந்தவர்களின் உடல்களை மீட்டு பிரேதப் பரிசோதனைக்காக அரசு மருத்துவமனைக்கு அனுப்பி வைத்தனர். மேலும், விபத்து குறித்து வழக்குப் பதிவு செய்து விசாரணை நடத்தி வருகின்றனர்.
காரில் வந்தவர்கள் யார். எந்த ஊரைச் சேர்ந்தவர்கள் என்பது பற்றிய விவரம் உடனடியாகத் தெரியவில்லை. இதுகுறித்தும் போலீஸார் விசாரித்து வருகின்றனர்.
