19 வயதுக்கு உட்பட்டோருக்கான ஆண்கள் உலகக்கோப்பை கிரிக்கெட் தொடருக்கான இந்திய அணி அறிவிக்கப்பட்டுள்ளது.
19 வயதுக்கு உட்பட்டோருக்கான ஆண்கள் உலகக்கோப்பை கிரிக்கெட் தொடர், தென்னாப்பிரிக்காவில் அடுத்த ஆண்டு ஜனவரி 19-ஆம் தேதி முதல் பிப்ரவரி 11 ஆம் தேதி வரை நடக்கிறது. இந்த ஆட்டத்தில் பங்கேற்கும் 16 அணிகள் 4 பிரிவுகளாக பிரிக்கப்பட்டுள்ளன.
‘ஏ’ பிரிவில் நடப்பு சாம்பியன் இந்திய அணி இடம் பிடித்துள்ளது. மேலும, வங்காளதேசம், அயர்லாந்து, அமெரிக்கா ஆகிய அணிகளும் இந்த பிரிவில் இடம் பிடித்துள்ளது.
‘பி‘ பிரிவில் இங்கிலாந்து, தென்னாப்பிரிக்கா, வெஸ்ட் இண்டீஸ், ஸ்காட்லாந்து அணிகளும், ‘சி’ பிரிவில் ஆஸ்திரேலியா, இலங்கை, ஜிம்பாப்வே, நமீபியா அணிகளும், ‘டி‘ பிரிவில் ஆப்கானிஸ்தான், பாகிஸ்தான், நியூசிலாந்து, நேபாளம் அணிகளும் இடம் பெற்றுள்ளன.
இந்திய அணி தனது முதலாவது ஆட்டத்தில் ஜனவரி 20-ஆம் தேதி வங்காளதேசத்தையும், அடுத்த ஆட்டங்களில் 25-ஆம் தேதி அயர்லாந்தையும், 28-ஆம் தேதி அமெரிக்காவையும் எதிர்கொள்கிறது.
இதற்கு முன்பாக, மூன்று நாடுகள் பங்கேற்கும் முத்தரப்பு தொடரில் இந்திய அணி விளையாட உள்ளது. இந்தியாவுடன், தென்னாப்பிரிக்கா, இங்கிலாந்து ஆகிய நாடுகள் கலந்து கொள்ளும் இந்த முத்தரப்பு தொடர் வருகிற 29-ஆம் தேதி முதல் ஜனவரி 10-ஆம் தேதி வரை நடக்கிறது.
இந்த நிலையில், ஜூனியர் உலகக் கோப்பை மற்றும் முத்தரப்பு தொடர் போட்டிக்கான இந்திய கிரிக்கெட் அணி நேற்று அறிவிக்கப்பட்டது.
முத்தரப்பு தொடர் மற்றும் ஜூனியர் உலகக் கோப்பை கிரிக்கெட் போட்டிக்கான இந்திய அணியில், உதய் சாஹரன் (கேப்டன்), செளமிகுமார் பாண்டே (துணை கேப்டன்), ஆதர்ஷ் சிங், சச்சின் தாஸ், அர்ஷின் குல்கர்னி, ருத்ரா மயூர் பட்டேல், பிரியன்ஷூ மொலியா, முருகன் அபிஷேக், முஷீர் கான், அரவெல்லி அவினாஷ் ராவ் (விக்கெட் கீப்பர்), இன்னேஷ் மகாஜன் (விக்கெட் கீப்பர்), தனுஷ் கவுடா, ஆரத்யா சுக்லா, ராஜ் லிம்பானி, நமன் திவாரி ஆகியோர் இடம்பெற்றுள்ளனர்.
முத்தரப்பு போட்டிக்கான காத்திருப்பு வீரர்கள்: பிரேம் தேவ்கர், அன்ஷ் கோசாய், அமான்.
மாற்று வீரர்கள்: திக்விஜய் பாட்டீல், ஜெயந்த் கோயத், விக்னேஷ், கிரண் சோர்மலே.
