அமைச்சர் பதவியை பொன்முடி இழந்ததைத் தொடர்ந்து, அவர் வகித்து வந்த இலாகாக்கள் அமைச்சர் ராஜகண்ணப்பனுக்கு கூடுதலாக ஒதுக்கப்பட்டுள்ளது. இதற்கு ஆளுநர் ஆர்.என்.ரவி ஒப்புதல் அளித்துள்ளார்.
வருமானத்துக்கு அதிகமாக சொத்து சேர்த்ததாக தொடரப்பட்ட வழக்கில், முன்னாள் அமைச்சர் பொன்முடி மற்றும் அவரது மனைவிக்கு தலா 3 ஆண்டுகள் சிறைத் தண்டனையும், தலா ரூ. 50 லட்சம் அபராதமும் விதித்து சென்னை உயர் நீதிமன்றம் இன்று உத்தரவிட்டுள்ளது. இதனையடுத்து பொன்முடி தனது அமைச்சர் மற்றும் எம்எல்ஏ பதவியை இழந்தார்.
இந்நிலையில், பொன்முடி வகித்து வந்த உயர்கல்வி, மற்றும் அறிவியல் தொழில் நுட்பத்துறை அமைச்சர் ராஜகண்ணபனுக்கு கூடுதலாக ஒதுக்கப்பட்டுள்ளது. ராஜகண்ணப்பன் வகித்து வந்த காதி மற்றும் கிராம தொழில்கள் வாரிய துறை அமைச்சர் காந்திக்கு கூடுதல் பொறுப்பாக வழங்கப்பட்டுள்ளது.
இதுதொடர்பாக தமிழக ஆளுநர் ஆர்.என்.ரவிக்கு முதலமைச்சர் ஸ்டாலின் கடிதம் எழுதியிருந்தார். அதற்கு ஆளுநர் ஒப்புதல் அளித்துள்ளார்.
