வரும் 29-ம் தேதி நடைபெறவிருக்கும் பிரதமர் நரேந்திர மோடியின் ‘பரிக்ஷா பே சர்ச்சா 2024’ நிகழ்ச்சியின் 7-வது எபிசோடுக்கு 22.6 மில்லியனுக்கும் அதிகமான மாணவர்கள் பதிவு செய்திருக்கிறார்கள்.
“பரிக்ஷா பே சர்ச்சா” என்பது இளைஞர்களுக்கு மன அழுத்தமில்லாத சூழலை உருவாக்க பாரதப் பிரதமர் நரேந்திர மோடி தலைமையிலான ‘எக்ஸாம் வாரியர்ஸ்’ என்ற பெரிய இயக்கத்தின் ஒரு பகுதியாகும்.
இதன்படி, நாடு முழுவதிலும் உள்ள மாணவர்கள், பெற்றோர்கள், ஆசிரியர்கள் மற்றும் வெளிநாடுகளில் இருப்பவர்கள் பிரதமர் மோடியுடன் கலந்துரையாடி, தேர்வுகள் மற்றும் பள்ளிக்குப் பிறகான வாழ்க்கை குறித்து விவாதிக்கும் ஒரு திட்டமாகும்.
இந்நிகழ்ச்சியில் 6 முதல் 12-ம் வகுப்பு வரையுள்ள மாணவர்கள் பங்கேற்கலாம். இந்நிகழ்ச்சி இதுவரை 6 முறை நடந்திருக்கிறது. இதில் ஏராளமான மாணவர்கள் பங்கேற்று பிரதமரின் கருத்துகளை கேட்டறிந்து பயன் பெற்றிருக்கிறார்கள்.
இந்த நிலையில், 7-வது பரிக்ஷா பே சர்ச்சா நிகழ்ச்சி வரும் 29-ம் தேதி நடைபெறவிருக்கிறது. இந்நிகழ்ச்சியில் பங்கேற்க 2023 டிசம்பர் 11-ம் தேதி முதல் இம்மாதம் 12-ம் தேதி வரை MyGov போர்ட்டலில் மாணவர்கள், ஆசிரியர்கள் மற்றும் பெற்றோர்கள் விண்ணப்பிக்கலாம் என்று அறிவிக்கப்பட்டிருந்தது.
மேலும், இவர்களில் 2,050 பேர் கேள்விகளின் அடிப்படையில் தேர்ந்தெடுக்கப்படுவார்கள். இவர்களுக்கு பிரதமர் மோடியின் கையெழுத்திடப்பட்ட, இந்தி மற்றும் ஆங்கிலத்திலான தேர்வு வாரியர்ஸ் புத்தகம் அடங்கிய சிறப்பு “பரிக்ஷா பே சர்ச்சா கிட்” மற்றும் சான்றிதழ் வழங்கப்படும் என்றும் கல்வி அமைச்சகம் தெரிவித்திருந்தது.
இது தவிர, இந்த ஆண்டு தனித்துவமான ஊடாடும் திட்டத்தின் மூலம் 4,000 பங்கேற்பாளர்கள் பிரதமருடன் உரையாடுவார்கள் என்றும், டெல்லி பாரத் மண்டபத்தில் டவுன்ஹால் வடிவத்தில் நிகழ்ச்சி நடைபெறும் என்றும் தெரிவித்திருந்தது.
இந்த நிலையில், 7-வது பரிக்ஷா பே சர்ச்சா நிகழ்ச்சிக்கு 22.6 லட்சம் பேர் பதிவு செய்திருக்கின்றனர். இது இதுவரை இல்லாத எண்ணிக்கையாகும் என்றும் கல்வி அமைச்சகம் தெரிவித்திருக்கிறது.
