75-வது குடியரசு தின விழாவை முன்னிட்டு, வரும் 26-ஆம் தேதி வரை, காலை 10:20 மணி முதல் நண்பகல் 12:45 மணி வரை, டெல்லியில் விமானங்கள் தரையிறங்குவதற்கும், கிளம்புவதற்கும் தடை விதிக்கப்பட்டுள்ளது.
வருகிற 26-ஆம் தேதி நாடு முழுவதும் குடியரசு தின விழா கொண்டாடப்பட உள்ளது. அப்போது, டெல்லி கடமைப்பாதையில் இராணுவ வீரர்கள் அணிவகுப்பு, மாநிலங்கள் மற்றும் மத்திய அமைச்சக துறைகளின் அலங்கார ஊர்திகள் அணிவகுப்பு, மோட்டார் மற்றும் விமான சாகச நிகழ்ச்சிகள் நடைபெற உள்ளன.
அன்றைய தினம் டெல்லியில் குடியரசுத் தலைவர் திரௌபதி முர்மு தேசியக் கொடி ஏற்றி வைத்து, முப்படைகளின் அணிவகுப்பு மரியாதையை ஏற்க உள்ளார்.
இந்த விழாவில் சிறப்பு விருந்தினராக, பாரத பிரதமர் நரேந்திர மோடியின் அழைப்பின் பேரில், பிரான்ஸ் அதிபர் இமானுவேல் மேக்ரான் கலந்து கொள்கிறார். தேசிய முக்கியத்துவம் வாய்ந்த நிகழ்வு நெருங்கி வருவதால், தலைநகர் டெல்லியில் பாதுகாப்பு பலப்படுத்தப்பட்டுள்ளது.
அந்த வகையில், குடியரசு தினத்தை முன்னிட்டு, வரும் 26-ஆம் தேதி வரை, காலை 10:20 மணி முதல் நண்பகல் 12:45 மணி வரை டெல்லியில் விமானங்கள் தரையிறங்குவதற்கும், கிளம்புவதற்கும் தடை விதிக்கப்பட்டுள்ளது.
இதுகுறித்து டெல்லி சர்வதேச விமான நிலைய நிர்வாகம் வெளியிட்ட அறிக்கையில் கூறியிருப்பதாவது, குடியரசு தின விழாவைக் கருத்தில் கொண்டு, வரும் 26-ஆம் தேதி வரை, காலை 10:45 மணி முதல் நண்பகல் 12:45 மணி வரை டெல்லி விமான நிலையத்தில் விமானங்கள் தரையிறங்குவதற்கும், கிளம்புவதற்கும் தடை விதிக்கப்படுவதாக கூறப்பட்டுள்ளது.
