சனாதனம் வீழ்ந்தால் பாரதம் வீழும் – தமிழக ஆளுநர் ஆர்.என்.ரவி

பாரதம் என்பது சனாதனத்தை அடிப்படையாகக் கொண்டு செயல்படுவதாக தமிழக ஆளுநர் ஆர்.என். ரவி தெரிவித்துள்ளார்.

சிருங்கேரி சாரதா பீடாதிபதி பாரதி தீர்த்த மகா  சுவாமிகளின் சன்யாச ஆஸ்ரம பொன்விழாவையொட்டி, சென்னை அடையாறு அனந்த பத்மநாப சுவாமி கோவில் அருகிலுள்ள கல்யாண மண்டபத்தில், ஏழு நாட்கள் சங்கர விஜயம் திருவிழா நடத்தப்படுகிறது.

இத்திருவிழாவில்,  தமிழக ஆளுநர் ஆர்.என்.ரவி கலந்து கொண்டார். அவர் சிறப்பாக பணியாற்றி வரும் கோவில் அர்ச்சகர்களுக்கு பாராட்டு சான்றிதழ்களை வழங்கினார்.

பின்னர் அவர் விழாவில் பேசியதாவது, ‘நமது ரிஷிகளும் சித்தர்களும் பல ஆயிரம் ஆண்டுகளாக பாரதம் ஒரு தேசம் என்ற எண்ணத்தையும் அடையாளத்தையும் விடாமுயற்சியுடன் முழு உலகையும் ஒரு குடும்பமாகக் கருதும் வாழ்க்கை மற்றும் படைப்பு பற்றிய ஒருங்கிணைந்த பார்வையுடன் வளர்த்து வருகின்றனர்.

இது சனாதன தர்மத்தின் அடிப்படை மற்றும் பாரதத்தின் மரபணு ஆகும். ஜகத்குரு ஆதி சங்கராச்சாரியார் அமைப்புசார்ந்த முறையில் நாட்டின் பல்வேறு மூலைகளிலும் நான்கு புனித பீடங்களை உருவாக்கினார்.

இந்த அமைப்புகள் கடினமான காலங்களில் நமது முக்கிய மதிப்புகள் மற்றும் நமது தேசத்தின் அடையாளத்தை மேலும் ஒருங்கிணைத்து நிலை நிறுத்தியுள்ளன. ஆதி சங்கராச்சாரியாரால் நிறுவப்பட்ட சிருங்கேரி பீடம் கடுமையான அந்நிய தாக்குதல்களை எதிர்கொண்டு நமது தேசிய மதிப்புகளைப் பாதுகாப்பதில் முக்கியப் பங்காற்றியது.

சுமார் 250 ஆண்டுகளாக கொடூரமான வெளித் தாக்குதல்களுக்கு எதிராக நமது தேசிய மதிப்புகளை வெற்றிகரமாகப் பாதுகாத்த விஜயநகரப் பேரரசை நிறுவியதில் மடத்தின் பங்களிப்பை மறக்க முடியாது.

இன்று நம் நாடு விழித்தெழுந்து, சகாப்த மாற்றத்தின் வாசலில் நிற்கும் வேளையில், பாரதத்தை விஸ்வ குருவின் தெய்வீக இலக்குக்கு அழைத்துச் செல்வதில் ஸ்ரீ சிருங்கேரி சாரதா பீடம் போன்ற அமைப்புகளின் பொறுப்பு மகத்தானது என தெரிவித்துள்ளார்.

சனாதன தர்மம் எந்த ஒரு ஏற்ற தாழ்வையும் வலியுறுத்தவில்லை. நாம் அனைவரும் ஒன்று என்றே சனாதனம் கூறுகிறது. பாரதம் என்பது சனாதனத்தை அடிப்படையாகக் கொண்டு செயல்படுகிறது. சனாதனம் வீழ்ந்தால் பாரதம் வீழும்” என்றும் அவர்  கூறினார்