நீலகிரி மாவட்டம் கோத்தகிரி பகுதியில், நீட் எதிர்ப்பு என்ற போர்வையில் பிரிவினைவாத, தேசவிரோத கருத்துகள் பரப்புவோரை கைது செய்ய வேண்டும் என மத்திய செய்தி மற்றும் ஒலிபரப்புத்துறை இணை அமைச்சர் எல்.முருகன் வலியுறுத்தியுள்ளார்.
இதுதொடர்பாக தனது எக்ஸ் தளத்தில் அவர் வெளியிட்டுள்ள பதிவில், சுற்றுலாப் பயணிகள் அதிகம் செல்லும் நீலகிரி மாவட்டம் கோத்தகிரி பகுதியில் உள்ள சாலையோர சுவர்களில் நீட் எதிர்ப்பு என்ற போர்வையில் பிரிவினைவாத, தேசவிரோத கருத்துகள் அப்பட்டமாக பரப்பப்படுகின்றன என சுட்டிக்காட்டியுள்ளார்.
தமிழகத்தில் திமுக கூட்டணியினர் செய்து வரும் நீட் வெறுப்பு பிரசாரம், தேச விரோத கும்பல்களுக்கு எந்த அளவிற்கு ஊக்கமளிக்கிறது என்பதற்கு சான்றுகள் தான் இவை என்றும் எல்.முருகன் குறிப்பிட்டுள்ளார்.
திமுக ஆட்சியில் தேச விரோத, பிரிவினைவாத கும்பல்களின் செயல்பாடு அதிகரித்து வருவது, பாரத தேசத்தை நேசிக்கும் ஒவ்வொருவரையும் வேதனைக்குள்ளாக்கும் செயல் என்றும், இதுபோன்ற பிரிவினைவாத கும்பல்களை முளையிலேயே கிள்ளி எறியாவிட்டால் தமிழகம் பெரும் ஆபத்தை சந்திக்கும் சூழல் ஏற்பட்டு விடும் எனவும் அவர் எச்சரித்துள்ளார்.
நீட் வெறுப்பு போர்வையில் பிரிவினைவாத பிரசாரம் நடப்பதை தமிழக முதலமைச்சர் மு.க.ஸ்டாலின் அறிவாரா? என கேள்வி எழுப்பிய எல்.முருகன், முதலமைச்சர் மு.க.ஸ்டாலின் உடனடியாக நடவடிக்கை எடுத்து தேசவிரோத கும்பல்களை கைது செய்ய வேண்டும் எனவும் வலியுறுத்தியுள்ளார்.
