மு.க.ஸ்டாலின், வைகோ, அன்புமணி, சீமான் உள்ளிட்டோரை முதலமைச்சர் விஜய் சந்தித்து வாழ்த்து பெற்றார். தமிழக முதலமைச்சராக பதவியேற்றுள்ள விஜய், அடுத்தடுத்து அரசியல் கட்சித் தலைவர்களை சந்தித்து வாழ்த்து பெற்று வருகிறார். அந்த வகையில், திமுக தலைவரும், முன்னாள் முதலமைச்சருமான ஸ்டாலினை சென்னை ஆழ்வார்பேட்டையில் உள்ள இல்லத்தில் முதலமைச்சர் விஜய் சந்தித்து வாழ்த்து பெற்றார். மரியாதை நிமித்தமாக சென்ற விஜய்யை எதிர்க்கட்சித் தலைவர் உதயநிதி ஆரத்தழுவி வரவேற்றார்.
இதைத்தொடர்ந்து சென்னை அண்ணா நகரில் உள்ள மதிமுக பொதுச்செயலாளர் வைகோ இல்லத்திற்குச் சென்று முதலமைச்சர் விஜய் வாழ்த்து பெற்றார். அப்போது விஜய்க்கு துரை வைகோ, மாலை அணிவித்து வரவேற்பு அளித்தார். இதையடுத்து சென்னை அக்கரை பகுதியில் உள்ள பாமக தலைவர் அன்புமணி இல்லத்திற்கு முதலமைச்சர் விஜய் சென்றார். விஜய்யை வாசல் வரை வந்து வரவேற்று அன்புமணி உபசரித்தார். இச்சந்திப்பின்போது சௌமியா அன்புமணி உள்ளிட்ட குடும்ப உறுப்பினர்களும் இருந்தனர்.
தொடர்ந்து, நீலாங்கரையில் உள்ள இல்லத்தில் நாம் தமிழர் கட்சியின் தலைமை ஒருங்கிணைப்பாளர் சீமானை முதலமைச்சர் விஜய் சந்தித்தார். விஜய்யை வீட்டு வாசலில் வந்து சீமான் ஆரத்தழுவி வரவேற்றார். முதலமைச்சர் விஜய் மற்றும் சீமான் பரஸ்பரம் பூங்கொத்து கொடுத்தனர். சீமானுக்கு பொன்னாடை அணிவித்து விஜய் வாழ்த்து பெற்றார்.
