சென்னை ஐஐடி இயக்குநர் காமகோடியை நாடாளுமன்றத்தில் விமர்சித்த காங்கிரஸ் எம்.பி. பிரியங்கா காந்திக்கு கல்வியாளர்கள் கண்டனம் தெரிவித்துள்ளனர்.
இதுதொடர்பாக பல்கலைக் கழக துணைவேந்தர்கள் உள்பட 215 பேர் பிரியங்கா காந்திக்கு எழுதியுள்ள கடிதத்தில்,
தங்களது விமர்சனம் நாட்டின் தலைசிறந்த நிபுணரின் கல்வித்திறனை குறைத்து மதிப்பிடுவதாக வேதனை தெரிவித்துள்ளனர்.
மேலும், சென்னை ஐஐடி இயக்குநர் காமகோடியின் கல்வித் தகுதியையும், பட்டங்களையும் அந்தக் கடிதத்தில் பட்டியலிட்ட அவர்கள்,
நாட்டின் சிறந்த விஞ்ஞானிகளில் அவரும் ஒருவர் என புகழாரம் சூட்டியுள்ளனர்.
தேர்வு சீர்திருத்த குழுவில் ஐஐடி இயக்குநர் காமகோடி இடம்பெற்றதற்கு காங்கிரஸ் எம்.பி. பிரியங்கா காந்தி ஆட்சேபம் தெரிவித்த நிலையில், அவருக்கு மக்களவையில் பாஜக எம்.பி. சுதான்ஷு திரிவேதி எதிர்ப்பு தெரிவித்துள்ளார்.
அமெரிக்காவிலும் பிரிட்டனிலும் கோமியத்தின் மருத்துவ குணம் அறிந்து காப்புரிமை வழங்கப்பட்டிருப்பதாக கூறிய அவர், மெக்காலே- மார்க்ஸ் கல்வி முறையில் பயின்றவர்களுக்கு அதைப் புரிந்துகொள்ள முடியாது என விமர்சித்தார்.
அகில இந்திய ஆயுர்வேத மையம் 50 ஆண்டுகளுக்கு முன்பே தொடங்கப்பட்டிருந்தால், மஞ்சளுக்கும், வேம்புக்கும் காப்புரிமை கோர, நாம் போராட வேண்டிய அவசியம் ஏற்பட்டிருக்காது எனவும் பாஜக எம்.பி. சுதான்ஷு திரிவேதி கூறினார்.
